"Paxtakor" akademiyasining Quvasoyda bo'limi ochildi

Klub sport direktori Grigoriy Ceytlin, akademiya direktori o'rinbosari Valeriy Borodavkin va Quvasoy shahar 1-sonli BO'SM futbol murabbiyi Akbar Siddiqov bo'limning rasmiy ochilish marosimida ishtirok etishdi. Quvasoydagi maktabda barcha zarur sharoitlar yaratilgan bo'lib, tarbiyalanuvchilar ixtiyorida katta va kichik tabiiy chimli futbol maydonlari, yopiq zal, basseyn, trenajyor zali va sauna mavjud. Ayni paytda uch yosh guruh toifasida 48 nafar tarbiyalanuvchi futbol saboqlarini olmoqda. Endi tarbiyalanuvchilar va guruhlar soni o'sib boradi. "Paxtakor" akademiyasi murabbiylari vaqti-vaqti bilan Quvasoyga tashrif buyurib, zarur maslahatlarni berib borishadi. Tarbiyalanuvchilar zarur sport liboslari bilan taminlab boriladi.

Grigoriy Ceytlin ushbu bo'lim ochilishi haqida quyidagi fikrlarni bildirdi:
- Termiz shahrida ishga tushirilgan bo'lim 2 yildan buyon faoliyat yuritib kelmoqda. Biz akademiya uchun biror hududda bo'lim ochishda u erdagi sharoitlarni hisobga olamiz. Quvasoydagi 1-sonli BO'SMda yoshlarga kerakli sharoitlar yaratib berilgan. Tarbiyalanuvchilarning kelajakda muvaffaqiyatlarga erishishi uchun imkoniyat bor. Ushbu maktab taklifiga ko'ra, barcha holatlarni o'rganib chiqdik. Umid qilamizki, bu bilan Quvasoy shahridagi yoshlarning futbolga bo'lgan qiziqishlarini oshirib bera olamiz. Yoshlarning sport bilan shug'ullanishlari juda foydali. Akademiyamizdagi mutaxassislar zarur paytda u erga borib, maslahatlar berib turishadi.

"Paxtakor" akademiyasining Quvasoy shahridagi bo'limi rasman faoliyatini boshladi.