O'zbekistonda Ravshan Ermatovni Twitter trendiga olib chiqishga qaror qilishdi

Bu haqda ijtimoiy tarmoqlarning foydalanuvchilari xabar berishmoqda.

Twitter’da O'zbekiston estradasi vakillarining Ravshan Ermatovning surati va #IrmatovBest heshtegi tushirilgan lavhani ko'tarib tushgan fotosuratlari paydo bo'ldi. Ular orasida xonandalar Tohir Sodiqov, Ravshan Komilov, Ulug'bek Rahmatullaev, Sardor Rahimxon, Alisher Fayz, Oybek va Nigora, Lola, Manzura, Ziyoda va boshqalarni ko'rish mumkin.

Etiborli tomoni, xonandalarning barchasi Uzbek Apparel libos brendi tomonidan tayyorlanadigan, milliy naqshlar fonida ingliz tilida O'zbekligimdan faxrlanaman (Proud to be Uzbek) yozuvi tushirilgan futbolkalarda suratga tushgan. Qayd etish joiz, FIFA referisi Ravshan Ermatovning o'zi ham Uzbek Apparel’ning aynan shunday libosini kiyib tushgan surati internetda mashhur.

Umuman, ushbu tadbirning tashkilotchisi kim ekanligi haqida ham rasmiy axborot berilmagan. O'zbek estradasi vakillari va ijtimoiy tarmoqlarning boshqa foydalanuvchilari Ermatovga bag'ishlangan #IrmatovBest (Ermatov – eng zo'r) heshtegini trendlar qatoriga 11 iyul, juma uni 16:00da olib chiqishni rejalashtirishmoqda.

Eslatib o'tamiz, Ravshan Ermatov Braziliya davom etayotgan futbol bo'yicha JCH-2014da to'rtta o'yinda (guruh bosqichida uchta, chorak finalda bitta) hakamlik qildi. JCH-2010dagi o'yinlarini qo'shib hisoblaganda, Ermatov jahon chempionatlari final bosqichida eng ko'p – to'qqizta o'yin boshqargan hakam sifatida futbol tarixidan joy oldi.

Hozirgi vaqtda Ravshan Ermatov JCH-2014 final uchrashuvini boshqarish uchun eng asosiy davogar bo'lib turibdi. Xususan, bukmekerlik idoralari Ermatovning imkoniyatlarini final o'yinida ishlashi mumkin bo'lgan boshqa barcha hakamlarnikidan yuqori baholamoqda.