O'zbekiston terma jamoasi Xitoy va Tojikistonga qarshi o'yinlarga tayyorgarlikni boshladi

Mashg'ulotlar poytaxtimizdagi "Yunusobod" sport majmuasi zalida olib borilayapti. Mazkur yig'in O'zbekiston MTJ uchun aprel oyida bo'lib o'tadigan xalqaro o'rtoqlik uchrashuvlari oldidan so'nggi tayyorgarlik vazifasini bajaradi.

Aprel oyida Nodir Eliboev boshchiligidagi O'zbekiston MTJ Xitoy hamda Tojikiston terma jamoalariga qarshi xalqaro o'rtoqlik uchrashuvlarini o'tkazishni rejalashtirgan. Dastavval, milliy terma jamoamiz 3 — 5 aprel sanalarida Xitoy Xalq Respublikasiga safar qiladi va osmono'par yurt futzalchilariga qarshi ikkita xalqaro o'rtoqlik uchrashuvida maydonga tushadi. Aprel oyining ikkinchi dekadasida esa Tojikiston milliy terma jamoasi mamlakatimizga tashrif buyurishi va qo'shni mamlakat futzalchilariga qarshi yana ikkita nazorat uchrashuvi bo'lib o'tishi rejalashtirilmoqda.

Avval xabar berganimizdek, Toshkentda o'tayotgan yig'in 20 martgacha davom etadi.