O'zbekiston terma jamoasi hujumchisiga Toshkent klublari "sovchi" qo'ygan

Qatar Superligasida faoliyat yuritgan Temurxo'ja Abduxoliqovning "As Sayliya" bilan tuzgan shartnomasi 30 iyun kuni yakunlanadi. Ayni paytda ushbu hujumchiga xorijdan va Toshkent jamoalari, xususan "Paxtakor", "Lokomotiv" hamda AGMK klubidan qiziqish mavjud.

Bu haqda saytimiz xodimi SHahboz Beg'amov malum qildi.

Temurxo'ja Abduxoliqovga mazkur jamoalardan takliflar tushmoqda.

Amaldagi chempion "Lokomotiv" agarda Nivaldoga chiqish eshiklarini ochadigan bo'lsa, unda Abduxoliqovni yana "temiryo'lchi"ga aylantirishi mumkin. Ayni paytda "Loko"ning braziliyalik hujumchisi Nivaldoning ijara muddati tugagan. Nivaldoning jamoadan ketish ehtimoli yuqori. Agarda Nivaldo jamoadan ketadigan bo'lsa, unda "Loko" tabiiyki Temurxo'ja Abduxoliqovni ortga qaytarishga urinib ko'radi.

SHuningdek, Temurxo'ja Abduxoliqovni yana bir sobiq klubi "Paxtakor" ham terma jamoamiz forvardiga taklif bilan chiqqan. Ammo hozircha muzokaralar to'la yakunlanmagan. "Paxtakor" Dragan CHeran bilan kelishuvga erishgach, endi Abduxoliqov variantiga yana to'xtaladimi yoki yo'q, bu hozircha nomalum. Ammo Dragan CHeranni hujumchi ortida harakat qilishini inobatga olinsa, "sherlar" ham Abduxoliqov nomzodidan butunlay voz kechmasliklari mumkin.

Temurxo'ja Abduxoliqovga transfer bozori paytida tarkibini keskin kuchaytirmoqchi bo'layotgan AGMK ham xaridor. Ashurmatov AGMKda Temurxo'ja Abduxoliqovni ko'rmoqchi. Tomonlarning o'zaro muzokarasi davom etmoqda.

Temurxo'ja Abduxoliqov esa xorijdan tushayotgan qiziqishlarni o'rganib chiqqandan keyin Toshkent klublaridan bo'layotgan takliflarni o'ylab ko'rmoqchi. Abduxoliqov oldida bir qator variantlar mavjud. Ammo hujumchi hozircha yakuniy qarorga kelgani yo'q.