O'zbekiston klublari vakillari Madridda

Ushbu memorandumga ko'ra, La liga mutaxassislari marketing, futbolga oid turli dasturlar, klublar bilan ishlash, translyaciyalar va boshqa ko'plab masalalar bo'yicha yurtimizdagi mutaxassislarga yordam beradigan bo'lishgan va o'zaro hamkorlik doirasida qator loyihalar amlga oshirib kelinmoqda.

Joriy yilning 6-8 may kunlari O'zbekiston Professional futbol ligasi mutaxassislari hamda Superliga klublarining marketing, xalqaro aloqalar bo'limlari xodimlari uchun Ispaniya poytaxti Madrid shahrida o'quv-seminari tashkil etilmoqda. Seminarning ilk kunida o'zbekistonlik mutaxassislar “Real Madrid” klubi qarorgohida maruzalar tinglashdi. Dastlab “Real Madrid” klubining strategik rivojlanish bo'limi boshlig'i sifatida faoliyat yuritgan Xose Ramon Kapdevilya o'z tajribalari bilan o'rtoqlashdi. So'ngra “Real Madrid” klubining 2006-2009 yillardagi prezidenti Ramon Kalderon seminarni olib bordi. Klub boshqaruvi tizimida ulkan tajribaga ega bo'lgan ushbu mutaxassis asosan klub menejmenti, klubni iqtisodiy tang ahvoldan qanday olib chiqish, klubning o'z xarajatlarini o'zi qoplashi uchun amalga oshirilishi lozim bo'lgan choralar, homiylar bilan samarali ishlash bo'yicha taqdimot o'tkazdi.

Seminar davomida, shuningdek, futbol sanoatining hozirgi darajada rivojlanishida klub va liganing o'rni, klublarda marketing sohasini rivojlantirish, klublarga saviyali legionerlarni jalb etishdagi muhim omillar, qolaversa, liga nufuzi va ommabopligini oshirishda mashxur futbolchilardan unumli foydalanish kabi masalalar muhokama etildi.

Bugun o'zbek mutaxassislari “Real Madrid” akademiyasiga tashrif buyurishadi va akademiya faoliyati bilan yaqindan tanishishadi. SHuningdek, kunning ikkinchi yarmida La liga klublari vakillari bilan qator uchrashuvlar tashkil etiladi va o'zaro aloqalarni mustahkamlash, dunyoning ilg'or mamlakati bo'lgan Ispaniya klublarining futbolda erishgan yutuqlari va tajribalarini o'zbek klublarida ham tatbiq etish bo'yicha fikrlar almashilishi ko'zda tutilgan.