Oliy liga. 6-tur ramziy terma jamoasi

Bu turni Bekobodda o'tkazgan "Navbahor" klubi ortga durang bilan qayta oldi. Ilhom Mo'minjonov shogirdlari orasida darvozabon Asilbek Omonov boshqalardan ajralib tura oldi. U o'z darvozasiga yo'llangan zarbalarni qaytarib jamoasining durangga erishishida katta xissa qo'shdi.

O'tgan tur "Nasaf"ni mag'lub etgan "Olmaliq" bu safar Toshkentda "Obod" mehmoni bo'ldi. Zerikarli o'tgan bahsda bittagina gol barchasini hal qildi. Bu golning qadri Viktor Kumikov shogirdlari uchun juda katta edi. SHu bois Vladislav Kasiminin ramziy termaga kiritishga qaror qildik.

"Qo'qon-1912" Muborakda "Mashal" mehmoni bo'ldi. Bu uchrashuvda mehmonlar himoyachisi Akmal Xolmurodov ishonchli o'ynadi, bundan tashqari o'z nomini tabloga yozdirib qo'ya oldi.

Mavsumni omadsiz tarzda boshlagan "Bunyodkor" nihoyat bu turda g'alaba qozona oldi. "Qaldirg'ochlar" Farg'onadan 3 ochko bilan qaytishdi. Bunda jamoa o'ng qanot himoyachisi Dilshodbek Ahmadalievning xissasi katta bo'ldi. Himoyachi o'z vazifasini yaxshi bajarishdan tashqari hujumchilarga yordam berib muhim golni urishga erishdi.

"Dinamo" ikki mag'lubiyatdan so'ng yana g'alabaga erisha oldi. Jamoa o'z maydonida "Buxoro"dan ustun keldi. Qanot yarim himoyachisi Orif Mamajonov shu kuni maydonda juda faol o'ynadi. U o'z hisobiga gol yozib qo'yishdan tashqari Javohir Qahramonovga golli pas oshirdi.

"Bunyodkor" tarkibida juda ham faol o'ynagan yana bir futbolchi bu Dostonbek Hamdamov bo'ldi. Uning bir nechta zarbalari xavfli chiqdi, bir marta u darvoza ustunini nishonga oldi. Baribir jarima to'pidan gol ura olgan Hamdamov ramziy termaga kiritildi.

"So'g'diyona" Navoiyda o'zi uchun g'alabaga teng bo'lgan durang qayd etdi. Jarima to'pidan chiroyli gol urgan Sanjar Rashidov mavsumda ikkinchi bor ramziy termaga kiritildi. Rashidovning goli yakunda Jizzax klubiga safardagi muhim 1 ochko keltirgani oydinlashdi.

"SHo'rtan" o'z maydonida grandlarni "adabini" berishda davom etadi. G'uzor klubi o'tgan tur "Lokomotiv"ni mag'lub etgandi. Bu safar jamoa "Paxtakor"ni tor-mor etdi. Yarim himoyachi Marufxon Murodov "sherlar"ga qarshi juda yaxshi o'ynadi va golli pas oshirishga erishdi.

"Mashal" bu turni o'z uyida "Qo'qon-1912"ga qarshi o'tkazdi. Mezbonlar bahs davomida raqibga yutqazib turib so'nggi daqiqalarda gol urib mag'lubiyatdan qutulib qolishdi. SHu kuni raqibga tinchlik bermagan Humoyun Murtazoev baribir o'z niyatiga etdi va gol ura oldi.

"Lokomotiv" turning markaziy o'yinida "Nasaf"ni mag'lub eta oldi. SHu kuni "temiryo'lchilar" safida hujumchi Marat Bikmaev juda faol hamda foydali o'ynay oldi. Hujumchi ikkala taymda bittadan gol urib "Lokomotiv"ning g'alabasiga katta xissa qo'shdi va ikkinchi bor ramziy terma jamoadan o'rin oldi.

"SHo'rtan"ning "Paxtakor" ustidan qozongan yirik g'alabasida asosiy ishni hujumchi Igor Taran bajardi. Tajribali futbolchi "sherlar" darvozasiga ikkita gol urishga muvaffaq bo'ldi.

Championat.asia talqiniga ko'ra oliy liganing 6-turi ramziy terma jamoasi

Darvozabon
Asilbek Omonov "Navbahor"  (Ramziy terma jamoada 2-marta)

Himoyachilar
Vladislav Kasminin "Olmaliq"  (2)
Akmal Xolmurodov "Qo'qon-1912"
Dilshodbek Ahmadaliev "Bunyodkor"

Yarim himoyachilar
Orif Mamajonov "Dinamo"
Dostonbek Hamdamov "Bunyodkor" (2)
Sanjar Rashidov "So'g'diyona"  (2)
Marufxon Murodov "SHo'rtan"

Hujumchilar
Humoyun Murtazoev "Mashal" (2)
Marat Bikmaev "Lokomotiv" (2)
Igor Taran "SHo'rtan"