Oleksandr Pishur: Hozirgi ko'rsatkichlarim bilan to'xtab qolmochqi emasman

- Oleksandr, g'alaba va final muborak! Uchrashuvdan qanday taassurotlar oldingiz?
- Asosiy raqibimiz maydonida g'alaba qozonib, finalga yo'llanma olaganimizdan xursandman. CHempionat doirasida o'tgan har ikkala uchrashuvda ham “Lokomotiv” darvozasini ishg'ol qilgandim. Kubokda kechgan birinchi o'yinda hisobimga gol yoza olmagandim. SHu boisdan ham javob uchrashuviga puxta xozirlik ko'rib, Bugalo darvozasiga yo'l topishga intildim. Omadim chopib, temiryo'lchilar darvozasiga ikkita to'p kiritdim. Harakatlarim “Bunyodkor”ga foyda keltirayotganidan juda-juda xursandman.

- Aynan qaysi jabhada raqibni dog'da qoldirdik, deb o'ylaysiz?
- Uchrashuv davomida mezbonlarni asosiy futbolchilarini yopa oldik. SHuningdek, juda tartibli o'yin namoyish qilib, bexuda to'p oshirishlar va ortiqcha yugurishlardan o'zimizni tiydik. 2:0 hisobida oldinga chiqib olganimizdan keyin esa yana kamida uch marotaba raqib darvozasini ishg'ol qilishimiz mumkin edi.

- Hozircha “Bunyodkor” safida 20ta gol urishga erishdingiz. Bunga qanday erishyapsiz?
“Bunyodkor”da ko'p gol urayotganim birgina o'zimga bog'liq emas. Jamoamizda mohir ijrochilar bor. Ularning qo'llab-quvvatlashlari natijasida o'zimni juda erkin his qilyapman. Hozirgi ko'rsatkichlarim bilan to'xtab qolmoqchi emasman. Mavsum yakunigacha yana bir qancha o'yinlar bor. Ana shu uchrashuvlarda ham “Bunyodkor”ga foyda keltirmoqchiman.

Bahodir MIRZAEV suhbatlashdi.