OKMKning yaponiyalik legioneri Arixiro Sentoku: "Bu erga kelganimdan so'ng Sato Minori haqida gapirishni boshlashdi. O'zbekiston o'sha o'yinda Yaponiyadan ustun edi"
14 iyu 2024 19:10
Yangiliklar

OKMKning yaponiyalik legioneri Arixiro Sentoku: "Bu erga kelganimdan so'ng Sato Minori haqida gapirishni boshlashdi. O'zbekiston o'sha o'yinda Yaponiyadan ustun edi"

Bilamizki, ichki chempionatimizda ishtirok etuvchi jamoalarimiz asosan Serbiya, Rossiya, Ukraina mamlakatlaridan futbolchilarni taklif qilishadi.

Lekin, oldingi yillarda sharqiy osiyolik o'yinchilar xizmatidan foydalangan klublarimiz ham bo'ldi. Tushungan bo'lsangiz gap Oliy va Superligamizda to'p tepgan Yaponiya va koreyalik legionerlar haqida ketmoqda. "Paxtakor" va "Buxoro"da o'ynagan Naoya SHibamura yodingizdami? "Bunyodkor"da muvaffaqiyatli natijalarga erishgan Sato Minorichi? Joriy mavsumda OKMK tarkibida yana bir yaponiyalik futbolchi Arixiro Sentoku to'p tepmoqda. Futbolchi O'zbekistonga moslashish jarayoni haqida fikrlarini bildirdi.

- 2024 yil boshida yangi jamoaga keldingiz. Birinchi davra yakuniga etmoqda. Taassurotlaringiz qanday?

- Hammasi odatdagidek. Yangi jamoaga kelib qo'shildim va shu erda o'ynamoqdaman. O'yin amaliyotiga ega bo'lmoqdaman. Bosh murabbiyimiz bizga ishonch bildirmoqda. Undan ko'p narsa o'rganishga harakat qilyapmiz.

- Hamyurtingiz Sato Minori "Bunyodkor"da tanilgandi, ajoyib o'yinlar ko'rsatgandi. Minori haqida eshitganmisiz?

- Yo'q, ammo O'zbekistonga kelganimdan keyin barcha menga Minori haqida gapirishni boshladi. O'shanda Sato Minori kimligini bilib oldim. O'zbekiston futbolini yuqori baholayman. Yaqindagina olimpiya terma jamoangiz Osiyo kubogi finalida Yaponiyaga qarshi o'ynadi. O'zbekiston o'sha uchrashuvda Yaponiyadan ustunroq edi. O'zbek futboli o'sib bormoqda.

- O'zbekiston iqlimi sizga qiyinchilik tug'dirmayaptimi?

- Yo'q. Men bunga qadar ko'p mamlakatlarda to'p tepganman. Ob-havo men uchun muammmo emas. Yaponiyadagi ob-havo biroz boshqacha, ammo yoz mamlakatingizda ancha issiq bo'lishi haqida eshitdim.