Odil Ahmedov: "Barchasi yaxshi bo'lishiga ishonaman"

"O'yin qiyin o'tdi. Eron termasi baribir bizdan anchagina yuqori jamoa. Ularga qarshi o'yin shuni ko'rsatib berdiki, biz o'z ustimizda hali anchagina ishlashimiz kerak. O'yin davomida ko'plab kamchiliklarga yo'l qo'ydik. Buni vaqtlar davomida to'g'rilay olamiz.

Suriyaga qarshi o'yinda ham, Eronga qarshi uchrashuvda ham bir xil taktika, bir xil ko'rsatmalar bilan o'ynadik. Uslub va tarkibda o'zgarishlar bo'ldi. Hozircha yangi bosh murabbiyning o'yin uslubiga to'liqligicha moslasha olmadik. SHu boisdan, natijalarda biroz oqsadik. Ektor Kuper terma bosh murabbiyligiga kelganiga ko'p vaqt bo'lgani yo'q. SHu boisdan barchasi yaxshi bo'lishiga ishonaman. Oldinda o'rtoqlik o'yinlari etarlicha. Ushbu bahslar orqali Osiyo kubogiga yaxshi tayyorlana olamiz", - dedi Odil Ahmedov.