Obod futbol klubi muxlislarni derbi bahsiga chorlaydi

Mazkur uchrashuv 23 aprel kuni “JAR” stadionida soat 17:00da boshlanadi. “Derbi” maqomida o'tadigan ushbu uchrashuvga qiziqish yuqori, desak mubolag'a bo'lmaydi. Boisi, Obod futbolchilari shu kunga qadar “qaldirg'ochlar” bilan O'zbekiston kubogi bahslari doirasida uch bora to'qnash kelishgan va har safar nomdor raqibga munosib qarshilik ko'rsata olgan. Yodingizda bo'lsa, o'tgan yili mamlakat kubogi 1/8 final bosqichida dastlab Obod o'z maydonida kichik – 0:1 hisobida yutqazgan, ammo mehmonda durang qayd etgandi. Lekin ikki o'yin natijasiga ko'ra keyingi bosqichga Bunyodkor yo'l olgandi.

Joriy yilda ham bu ikki klub yana O'zbekiston kubogi 1/8 finalida to'qnash kelib qolishdi va “JAR” stadionida o'tgan dastlabki uchrashuvda kuchlar teng keldi – 2:2. Ushbu omillar tanish raqiblarning navbatdagi to'qnashuviga bo'lgan qiziqishni ham oshirmoqda. Negaki, bugungi o'yinda Bunyodkor g'alabaga erishib, peshqadamlar safidan tushib qolmaslikka intilsa, Obod mavsumdagi dastlabki g'alabasini tantana qilish uchun astoydil bahs olib boradi. Bularning barchasi uchrashuvning keskin va murosasiz kurashlar ostida o'tishini taminlaydi. Siz Obod - Bunyodkor uchrashuvini bevosita stadiondan turib tomosha qilishni istasangiz, “JAR” stadioniga marhamat!

Uchrashuvga chiqarilgan chipta-taklifnomalarni “JAR” stadioni kassalaridan bepul qo'lga kiritishingiz mumkin. SHoshiling!!!

O'zbekiston XXV milliy chempionati. 6-tur
23 aprel, soat 17:00. “JAR” stadioni
Obod (Toshkent) – Bunyodkor (Toshkent)
Hakamlar: H.Ro'ziev (Toshkent), O.Abduvasilov (Toshkent), S.SHoyusupov (Toshkent), A.Rubakov (Toshkent)
Nazoratchi hakam: B.Tog'aev (Toshkent).
PFL vakili: F.Magometov.