Nodir Eliboev: Osiyo chempionatiga chiqish vazifani uddaladik

Uchrashuvdan so'ng terma jamoa bosh murabbiyi assistenti, terma jamoaning sobiq azosi Nodir Eliboev O'FF matbuot xizmati bilan suhbatda o'yin haqidagi fikrlari, qo'lga kiritilgan OCH yo'llanmasi va bo'lajak bellashuv haqida o'z fikrlarini bildirib o'tdi.

“Turkmaniston terma jamoasi dastlabki daqiqalardan faollik ko'rsatib, ko'plab vaziyatlarga ega bo'ldi. Yigitlarimiz esa aksincha o'yinni juda sust boshlashdi. Baxtimizga Rustam Umarov bir necha vaziyatlarda o'z mahoratini ko'rsatib, jamoamizni muqarrar gollardan saqladi. Ikkinchi bo'lim umuman boshqacha ko'rinish oldi. Ustunlik biz tomonga o'tdi va raqibga erkin o'ynash uchun imkoniyat bermadik.

O'tkazib yuborilgan gollarga kelsak, birinchi golni 10 metrlik nuqtadan, ikkinchisini esa raqib o'ynovchi darvozabonni tushirganidan keyin qo'yib yubordik. Uchrashuvning yakuniy natijasi va yigitlarning o'yinidan ko'nglimiz to'ldi. Oldimizga Osiyo chempionatiga chiqish vazifasi qo'yilgandi va biz buni uddaladik. Qirg'izistonga qarshi o'yin bugungisidan osonroq kechadi deb o'ylayman. Umid qilamanki, so'nggi bellashuvda ham g'alaba qozonamiz”, – dedi Nodir Eliboev.

Terma jamoa bosh murabbiyi yordamchisi tarkibdagi xato va kamchiliklar haqidagi savolga javob berar ekan, ularning barchasi o'yindan-o'yinga bartaraf qilinayotganini bildirdi.

“Albatta, kamchilik va xatolar, o'yinchilarga etirozlar bo'ladi. Ammo bularning barchasini o'yindan-o'yinga bartaraf qilib borayotganimiz kishini xursand qiladi. Ish bo'layotgan har qanday joyda kamchilik va xatolar uchrab turadi”, – deya o'z fikriga yakun yasadi Nodir Eliboev.  

Eslatib o'tamiz, saralash bosqichi “A” guruhi so'nggi turida O'zbekiston terma jamoasi Qirg'iziston futzalchilariga qarshi maydonga chiqadi. Uchrashuv Toshkent vaqti bilan 15:30 da boshlanadi.