Kristian Novak: "Muxlislar stadionda tasavvur qilib bo'lmaydigan darajadagi atmosferani yaratishadi va birinchi o'yinimni sabrsizlik bilan kutyapman"

Yaqinda "burgutlar" azosiga aylangan polshalik himoyachi Kristian Novak ayni paytda jamoa bilan Tojikistondagi yig'inda ishtirok etyapti.

Kuni kecha "Andijon"ning yangi legioneri klub matbuot xizmatiga ilk intervyusini berdi.

— Kristian, "Andijon" klubiga xush kelibsiz! Bu taklif siz uchun qachon sodir bo'ldi va sizga rozi bo'lishga asosiy sabab nima edi?

— Qozog'istonning "Jenis" klubi bilan shartnomani bekor qildim va "Andijon"dan taklif oldim. Ular menga taqdim qilgan loyiha, jamoaning qanday ishlashi, Osiyo Chempionlar Ligasida ishtirok etishi, muxlislar — bularning barchasi mening shartnoma imzolashimga asosiy turtki bo'ldi. Murabbiy ham muhim jihat edi. Chunki uni "Paxtakor"da bosh murabbiylik qilganini bilardim. Mening do'stim Banashak ushbu klubda o'ynagan va shu jihatdan men Maksim Shackixni tanirdim. Bu esa mening qarorimga tasir qildi.

— Jamoa bilan birinchi mashg'ulotingizni o'tkazganingizda muxlislar sizni nihoyatda iliq qarshi olishdi. Dastlabki kundan bunday muhitni kutgandingizmi?

— Men o'yinlarni tomosha qildim. Muxlislar tasavvur qilib bo'lmas darajadagi atmosfera yaratgan. Futbolchilarni ajoyib qo'llab-quvvatlashadi. Meni ham zo'r kutib olishdi. Ikkinchi davra boshlanishidan oldin bu biz uchun katta ruhiy quvvat bo'lyapti.

— Ikkinchi davra "Andijon" uchun juda muhim. Jamoa chempionatdagi o'rnini yaxshilashi va Osiyo Chempionlar Ligasida debyutini o'tkazishi lozim. Bu haqda nima deya olasiz?

— Ikkinchi davra oldidan tayyorgarlik mashg'ulotlarini o'tkazyapmiz. Mavsumning ikkinchi qismiga yaxshi formada kirib borishga harakat qilamiz. Murabbiylar barchasini rejalashtirib chiqqan. Qo'limizdan kelganicha qattiq mehnat qilib, mavsumning qolgan qismidan eng yaxshi natijalarni olishga harakat qilamiz. Ushbu ijobiy natijalarimiz ikkinchi davraning ilk o'yinidan boshlanishidan umidvormiz. OCHLdagi debyut uchrashuvimiz ham juda muhim. Buni hamma anglab turibdi. Barchaning xohishi kuchli va ular shu yo'lda jonini berib mashg'ulot o'tkazayotganini ko'rish mumkin. Jamoaning har bir azosi bunga tayyor bo'lishi uchun qattiq shug'ullanyapti.

— Qaysi raqamni tanladingiz?

— 27-raqamni kiyaman. Bu menga juda yoqadi. Kelganimda ushbu raqam bo'sh ekan. So'nggi paytlarda odatda 15-raqamda to'p surardim. Lekin bu jamoada u band ekan, boshqa futbolchi o'ynayapti. Shu bois 27ni tanladim.

— Siz ilgari Evropada turli chempionatlarda o'ynagansiz. Osiyoga esa birinchi bor kelyapsiz. Bu sizning faoliyatingizda yangi sahifami?

— Qozog'istonda o'ynadim va bu Osiyoga yaqin. Bundan tashqari, Evropaning yana bir nechta davlatlarida ham o'ynaganman. Turli davlat va ligalarga moslashishda menda muammo yo'q, deb hisoblayman. Har bir mamlakat — yangi joy, yangi chaqiriq va yangi vazifa. Bularning barchasiga men doim optimistik kayfiyatda yondashaman. Hammasi yaxshi bo'lishiga ishonaman.

— Siz bungacha O'zbekiston futboli va "Andijon" haqida nima bilardingiz?

— Mening do'stim Pshemislav Banashak "Paxtakor"da o'ynaganida menga liga haqida gapirib bergan. "Andijon"ning bir nechta o'yinlarini tomosha qilganman. Bu juda muhimki, jamoa tabiiy maydonda o'ynayapti. Stadion katta. Barchasi menga professional futbol atmosferasidek tuyulyapti. Andijonda muxlislar jamoani juda qattiq va kuchli qo'llab-quvvatlashadi. Buni har bir uchrashuvda namoyon etishadi. Bu har bir insonga motivaciya beradi. Oldimizda turgan birinchi o'yinimni sabrsizlik bilan kutyapman.