Nematullo Quttiboev: "Ayrim chiziqlarni kuchaytirishimiz kerak"

Ilgari hujum chizig'ida to'p surgan Quttiboev bugungi kunda murabbiylik sohasida faoliyat olib bormoqda. Aniqrog'i birinchi liga ishtirokchisi Nukusning "Orol" jamoasiga ustozlik qilib kelayotgan murabbiy bugun saytimizga jamoasining davralar oralig'idagi yig'ini va kelgusi rejalar to'g'risida qisqacha intervyu berdi.

- Nematullo aka, xabaringiz bo'lsa kerak, bugungi kunda birinchi liga jamoalarining aksariyati ikkinchi bosqich o'yinlariga tayyorgarlikni boshlab yuborgan. Saytimiz orqali imkon qadar har bir jamoa to'g'risidagi yangiliklarni berib borishga intilmoqdamiz. SHu o'rinda boshqaruvingizdagi "Orol" xususidagi yangiliklarni bilib olsak foydadan xoli bo'lmasdi.
- Ha, ayni paytda ko'plab klublarni yig'in o'tkazishayotganini bilaman. Lekin jamoamiz hozircha tayyorgarlikni boshlamadi. SHu bois sizga birorta yangilik aytishim qiyin.

- Ikkinchi bosqich startiga oz fursat qolgan bo'lsada, "Orol"ning hanuz tayyorgarlikka kirishmaganini qanday tushunish mumkin?
- Bu birinchi navbatda moliyaviy jihatga bog'liqdir. Agar imkonimiz bo'lganida, yig'inga ertaroq kirishardik. Klubda moddiy muammolar yuzaga kelgan.

- Tan olish kerak, bugungi kunda birinchi liganing ko'plab jamoalarida futbolchilar bilan bog'liq qarzdorlik mavjud. Aytingchi, "Orol" o'z futbolchilaridan nechta oylik qarzdorligi bor?
- To'g'risi, bu haqda biror nima deya olmayman. Yaxshisi boshqa savolga o'ta qolaylik...

- Unda aytingchi, jamoa endi mashg'ulotlarga qachondan kirishadigan bo'lmoqda?
- SHu kunlarda muammo bartaraf etilishiga umid qilmoqdamiz. Nasib bo'lsa bugun-erta futbolchilarni yig'amiz.

- Jamoani tark etgan futbolchilar bo'lsa kerak?
- Hozircha birgina himoyachi Temur Turdiev safimizni tark etdi. Qolgan o'yinchilar menga ketish to'g'risida hech nima demadi.

- Ikkinchi bosqichda kurash qizg'in va shu bilan birga murakkab kechadi. Aytingchi, qaysi chiziqlarni kuchaytirishni rejangizga kiritgansiz?
- Albatta, ikkinchi davraga qadar tarkibga yangi futbolchilarni jalb etishimiz kerak. Birinchi navbatda darvozabon olishimiz shart. Keyin yana ayrim poziciyalardagi raqobatni ham oshirsak maqsadga muvofiq bo'lardi.


Islombek Rustambekov suhbatlashdi.