“Neftchi” yig'inni boshladi

Abdusamad Do'rmonov boshqaruvidagi jamoa 20 dekabrdan o'z qarorgohida yig'ildi va rejaga binoan mashg'ulotlar 28 dekabrga qadar davom ettiriladi.

Tayyorgarlik rejasiga ko'ra, o'quv-yig'in mashg'ulotlarining dastlabki qismida futbolchilar kuniga bir mahaldan shug'ullanmoqda. Murabbiylar asosiy etiborni jismoniy tayyorgarlikka qaratayotganini ham qo'shimcha qilish joiz.

Tarkibda asosan mahalliy futbolchilarni uchratish mumkin. O'z vaqtida “Neftchi”ning haqiqiy etakchisi bo'lgan Mansur Saidov yana qadrdon jamoasi safiga qaytib, mashg'ulotlarda ishtirok etmoqda. Muxlislarga yaxshi malumki, 36 yoshli futbolchi bu yilgi mavsum hech bir jamoa safida ko'rinish bermadi. Aftidan Saidov futbolchilik faoliyatining so'nggi yillarini “Neftchi”da o'tkazish niyatida.

Undan tashqari Otabek Zokirov ham “Neftchi” mashg'ulotlariga qo'shildi. 27 yoshli futbolchi ham ushbu klub tarbiyalanuvchisi hisoblanadi. Zokirov bu yilgi mavsumni xorijda aniqrog'i Bangladeshda o'tkazib qaytdi. Otabek so'nggi bor 2014 yili “Neftchi” tarkibida xarakat qilgandi. Oradan 5 yil o'tib u yana qadrdon jamoasiga qaytib keldi.
SHuningdek “Neftchi” mashg'ulotlarida Eldor Ergashevni ham uchratish mumkin. PRO-Liga toifasida ancha tajribali bo'lgan 29 yoshli markaziy yarim himoyachi hozirda ko'rikda bo'lib turibdi.

“Neftchi” murabbiylar shtabi tarkibni kuchaytirish maqsadida o'tgan mavsum jamoa sharafini himoya qilgan jizzaxlik hujumchi Doston Toshmatovni ham ortga qaytarmoqchi.