Murod Ismoilov: "3 daqiqa ichida g'alabani boy berdik"

Unda olmaliqliklar 3:2 hisobida g'alaba qozonishgan edi. Uchrashuvdan so'ng "Neftchi" ustozi Murod Ismoilovning fikrlari bilan qiziqdik.

- Tayyorgarlik davom etmoqda, o'yinchilar kuchli jismoniy yuklamalar ostida to'p tepishdi. SHunga qaramay, shogirdlarim chiroyli va mazmunli o'yin namoish etishdi. Afsuski, ikkita majburiy o'zgarish bellashuvga sezilarli tasir o'tkazdi. Jahongir Mexmonov jarohat olib o'zgartirilgan bo'lsa, ikkinchi bo'limda Umid Qodirov biroz charchab qoldi va ularning o'rniga tushganlar o'yinga kirishib keta olishmadi. Qanotlarimiz kuchsizlanib qolgach, 3 daqiqa ichida ikkita to'p o'tkazib yubordik. O'yinning umumiy suratini oladigan bo'lsak, yigitlarni harakatlaridan ko'nglim to'ldi, biz to'g'ri yo'ldamiz. Nasib qilsa, keyingi bahslarda o'z o'yinimizni yanada shakllantirib boramiz.

- Akmal Xolmatovni masalasi to'liq hal bo'ldimi?
- Yaqin bir yarim yil davomida Akmal Xolmatov biz bilan birga bo'ladi. Bu masala deyarli hal qilingan, yaqin kunlarda u bilan rasman shartnoma imzolaymiz.

- Yig'inga chaqirilganlar haqida nima deya olasiz?
- SHu kungacha tibbiy ko'rik natijalarini kutayotgan edik, bugun natijalar chiqdi. Yangilarning hammasi undan ijobiy o'tishdi va mo'ljalimiz bo'yicha yig'indagilarni jamoada olib qolamiz. Tibbiy ko'rikdan faqatgina Devid Oniya o'ta olmadi va endi u biz bilan birga emas.


Tolibjon Qosimov suhbatlashdi