Mundial oldidan. Ravshan Xursanov: "Maydonga tushgach, borimizni berishga vada beramiz"

"Yaxshi niyatlar bilan yo'lga chiqdik. Bizni butun xalqimiz qo'llab-quvvatlab turishini his qilamiz va maydonga tushgan har bir futbolchi yurakdan o'ynashiga vada beramiz. Oddiy turnir yoki chempionat oldida emasmiz. Juda katta masuliyat va bosim bo'ladi. Biz uddalashimizga ishonaman", - deydi Ravshan Xursanov.

- Aynan bosim haqida gapirdingiz. Bu jamoa uchun , ayniqsa Jahon chempionatida birinchi marta ishtirok etayotgan futbolchilarga qiyinchilik tug'dirmaydimi ?

Har bir futbolchini orzusi Jahon chempionatida o'ynash. Kimdir qachondir birinchi marta o'ynaydi. O'ylaymanki kuchli bosim maydonga tushguncha bo'ladi. Raqiblarimiz jiddiy. Germaniya Evropa chempioni, Fiji Okeaniya chempioni bo'lsa, Gonduras vice-chempionlardir. Har bir jamoaning kuchli jihatlari bor. Ularni hurmat qilgan holda O'zbekiston guruhda etakchi jamoadir deya olaman.

- Yoshlarimizning yig'inlari davomida asosiy hujumchilar sifatida SHomurodov va O'rinboev maydonga tushdi. Hujumchi sifatida bu chiziq borasida qanday fikrdasiz?

Maydonga kim tushishi emas, natija qanday bo'lishi eng muhimidir. Albatta har bir futbolchi maydonga tushishni, hujumchi esa gol urishni istaydi. Menda ham bunday niyatlar yo'q emas. Murabbiy ayni shu vaqtda kimni eng munosib deb topsa o'sha o'ynaydi. Qolgan barcha futbolchilar maydondagi 11 kishini qo'llab quvvatlashiga ishonaman.