“Metallurg”: Birinchi nazorat uchrashuvida “qizillar” yutdi

Aytish mumkinki, bu murabbiylarning jismoniy hamda ruhiy tayyorgarlik bo'yicha olib borayotgan mehnatlarining dastlabki sarhisobi bo'ldi. “Hozircha amalga oshirilgan ishlar haqida gapirishga erta. O'yinchilar endi jismoniy tayyorgarliklarini maromiga etkazishyapti. Tanaffusdan keyin esa tiklanish og'ir kechishini bilasiz. Maydonga, to'pga moslashish, bilim va ko'nikmalarni tiklab olish uchun vaqt kerak. Biroq futbolchilarimizning ayni paytdagi holati vaqt nuqtai nazaridan ko'ngildagidek deyish mumkin. Bugungi o'yin ham shuni ko'rsatib turibdiki, ishlar to'g'ri yo'lga qo'yilgan. Keyingi haftadan oliy liga jamoalariga qarshi o'rtoqlik nazorat uchrashuvlarini boshlaymiz. Nasib bo'lsa mavsum boshlangunicha tarkibni to'liq shakllantirib olamiz. Jamoada yoshlar ko'pchilikni tashkil etali. Ular o'z navbatida tajribali o'yinchilarimiz bilan birgalikda ishlashib, mahoratlarini oshirishmoqda. Asosiy tarkibga loyiq ekanliklarini isbotlashga urinishayapti. Bu tahsinga sazovor”, - deydi jamoa katta murabbiyi Fevzi Davletov.

Ko'rik uchrashuvi anchagina yuqori tempda, qiziqarli kurashlar ostida o'tdi va unda “qizillar” jamoasi 3:1 hisobida g'alaba qozondi. Alvon ranglilardan Zohid Abdullaev o'z hisobiga ikkita gol yozib qo'ygan bo'lsa, yana bitta golga Ayubxon No'monov mualliflik qildi. “Sariq”lardan esa javob golini 11 metrlik belgidan Hikmat Hoshimov kiritdi. Quyida tarkiblarga etibor bering.

“Qizillar”: Suhrob Sultonov, Jasur Ahmedov, Zufarjon Akbaraliev, Ulug'bek Xudoyberdiev, Rustam Azamov, Ulug'bek Xudoyorov, Ayubxon No'monov, Sunnatilla Ermatov, Ruslan Vagapov, Murodjon Toshmatov, Zohid Abdullaev.
“Sariqlar”: Zafar Safoev, Davron Karimqulov, Hikmat Hoshimov, Vusal Mageramov, Mirg'iyos Sulaymonov, Ulug'bek Boqiev, Doniyor Odilov, Dilmurod Karimov, Ulug'bek Dadaboev, Said Abdujabborov, Sardor Rasulov.

Tarkiblarga nazar tashlar ekansiz, bir qator yangi nomlarni uchratasiz. Ammo ulardan kimlar asosiy tarkibdan muqum joy egallaydi va kimlar bilan shartnoma imzolanadi, buni vaqt ko'rsatadi. SHuningdek, jismoniy tayyorgarligini maromida ushlab turishni istagan Rustam Azamov ham mazkur uchrashuvda maydonga chiqdi.
Endi bekobodliklar oliy liga vakillari bilan nazorat uchrashuvlarini o'tkazishadi. Jumladan, 14 yanvar kuni “Qo'qon 1912”, 16 yanvarda “Bunyodkor-2”, 19 yanvarda “Mashal” hamda 26 yanvarda “Buxoro” jamoalariga qarshi o'yin o'tkazilishini yana bir marta eslatib o'tamiz.