“Mashal” ukrainalik futbolchi bilan shartnoma imzoladi

Notinch vaziyat sabab milliy chempionat uchrashuvlari to'xtab qolganidan kelib chiqib, FIFA ukrainalik futbolchilarni transfer oynasidan tashqari ham ro'yxatdan o'tkazishga ruxsat bergandi.

Hujumchi Mikola Agapov 1993 yilning 13 noyabr kuni Xarkov shahrida dunyoga kelgan. Uning so'nggi jamoasi “FK Alyans” Ukraina Birinchi ligasi vakili hisoblanar edi. Endilikda futbolchi “Mashal”ning Superliga yo'lidagi raqobatiga yordam berishga harakat qiladi.

Futbolchi 31 mart kuni O'zbekistonga etib kelgan. Ayni vaqtda Muborak shahrida bo'lib turibdi.

"O'zbekiston Professional futbol ligasi Mikola Agapovga yurtimizdagi faoliyatida omad, uning vataniga esa tinchlik va osoyishtalik tilaydi", - deyiladi klub xabarida.