"Lokomotiv": Bugungi mashg'ulot “Qirol Abdulloh”da

Ertaga – 1 mart kuni jamoamiz mazkur shaharning “Al-Ittixod” klubiga qarshi saf tortadi.

Yakshanba kuni 10:00 da Toshkent xalqaro aeroportidan qo'zg'algan hamda o'z bortiga “Lokomotiv” delegaciyasini olgan samalyot besh soatdan biroz ko'proq parvoz etib, Jidda xalqaro aeroportiga qo'ndi. Klub ayni paytda “Radisson BLU” mehmonxonasidan qo'nim topgan. Ertangi bellashuv oldidan tarkibda bitta yo'qotish bor va u Jasur Hasanov nomi bilan bog'liq. Asosiy tarkibning qolgan azolari muhim o'yinga tayyor bo'lib turishibdi.

Jiddada mahalliy vaqt Toshkentnikidan ikki soat ortda yuradi. Havo harorati kutilganidek issiq. Bugun “Lokomotiv” futbolchilari o'yin bo'lib o'tadigan “Qirol Abdulloh” stadionida mashg'ulot o'tkazishadi. Unga qadar esa har ikki klub rasmiylari ishtirokida o'yinoldi miting hamda matbuot anjumani tashkil etiladi.

Qayd etish kerak, “Al-Ittixod” so'nggi bir hafta davomida ikki muhim bellashuvda maydonga tushdi. Toshkentda “Lokomotiv” bilan 1:1 hisobida durang o'ynagan Viktor Picurke shogirdlari, keyinchalik milliy chempionatning markaziy o'yinida peshqadam “Al-Hilol”ni safarda minimal hisobda taslim etishdi.

Bu natijalar raqibning kuchidan dalolat berib turibdi. SHunga qaramay “Lokomotiv” futbolchilari ertangi o'yinda faqat va faqat g'alaba uchun maydonga tushishadi. Umid qilamizki, ortga 3 ochko bilan qaytamiz.