Leonid Senkevich: “Mag'lub bo'ldik, ammo raqibdan bir bosh ustun edik“

“Bugun biz uchrashuvni to'liqligicha nazorat qildik. Uch ochko olish uchun loyiq edik. Ko'plab vaziyatlardan foydalana olmadik. Biroq yakunda ikki marta jarima zarbasidan keyingi qilgan xatolarimiz va qizil kartochka evaziga yutishimiz kerak bo'lgan o'yinda yutqazdik. Raqibdan bir bosh ustun ekanligimiz ko'rinib turgandi. So'nggi 5 daqiqada o'yinni boy berdik va muhim 3 ochkoni qo'ldan chiqardik.

Mavsum boshida biz yosh yigitlarni yig'a boshladik, ularning deyarli barchasi ikkinchi ligalarda o'ynayotgandi. O'shanda futbolchilar bir pog'ona balandga ko'tarilayotganini tushunmayotgandi. Keyinchalik ular rahbariyat va murabbiylar shtabining istaklarini tushuna boshlashdi. Ilk o'yinlarni tomosha qilishning o'zi dahshatli edi. Hozir esa “Lokomotiv-BFK“ futbolchilari chiroyli o'yin ko'rsatishmoqda.

Eng yosh darvozabonlar aynan bizda bo'lsa kerak. Ularni “Lokomotiv-BFK“da ancha vaqtdan buyon ishlayotgan, sobiq professional futbolchi Anton Devyashov tayyorlab bormoqda. Jamoadagi futbolchilardan tortib direktor, doktorlar, umuman olganda barcha bir maqsad yo'lida birlashgan. Bizda yaxshi kollektiv yig'ilgan. Mana o'yin yakunlandi, bizdan hech kim bir-biriga baqirmaydi, urushmaydi, o'tirishadi va qay tariqa mag'lub bo'lganini o'ylaydi. Barchasi yaxshi bo'ladi, yigitlarning o'yini ko'z oldimizda o'smoqda.

“A“ va “B“ zonadagilar bir mintaqada o'ynashini, barcha bir tomonda birlashishini istayman. SHunda biz “Andijon“, “Surxon“, “Istiqlol“ kabi jamoalar bilan o'ynardik. Yigitlarda ham anchagina o'sish bo'lardi. Pro-liga jamoalari tarkibida terma jamoalarda o'ynagan yaxshi saviyali futbolchilar bor. Bu esa tomoshabinlar sonini ham ko'paytirardi.

Kecha Sergey Lebedev bilan uchrashib oldik, ularga rahmat aytaman, bizga mashg'ulotlar uchun yaxshigina maydon taqdim etishdi. Mana shunday ishlar ham futbolchilar yanada yaxshiroq o'yin ko'rsatishi uchun omil bo'ladi“, - dedi Senkevich.

Bekzod Tolibov yozib oldi.