"Kengurular" bilan to'rtinchi to'qnashuv O'zbekistonga 5-mundial eshiklarini ochadimi? Bir qadam tashlansa bas

To'g'ri raqib kuchli, jismonan baquvvat futbolchilarga ega. Ammo aynan shu yosh toifasida avval ham 3 marotaba uchrashganimizni, ularning hech birida "kengurular" bizni enga olmaganini ko'rishimiz mumkin. Quyida ushbu uchrashuvlarning natijalari bilan tanishamiz. 

OFKga o'tganiga endigina 2 yil to'lgan Avstraliya 2008 yilgi yoshlar o'rtasidagi Osiyo kubogida guruh bosqichida ro'baro' kelgan. Musobaqada yorqin o'yin ko'rsatgan SHerzod Karimov 37-daqiqada hisobni ochgan, 48-daqiqada  Jeyms Rodney hisobni tenglashtirgan. O'zbekiston yakunda finalgacha etib borgan, Avstraliya yarim finalda BAAga 0:3 hisobida engilgan. 

2008 yil. Saudiya Arabistoni. 

"D" guruhi. 2-tur. 

O'zbekiston - Avstraliya 1:1

Gollar: SHerzod Karimov 37 - Jeyms Rodney 48

O'zbekiston: Doniyor Usmonov, SHerzod Azamov, Dilyorbek Irmatov, Murod Xolmuhammedov, Islom To'xtaxo'jaev, Oybek Qilichev, Fozil Musaev, Sunnatilla Mamadaliev, Jasur Hasanov, SHerzodbek Karimov, Kenja To'raev

U-20 toifasida Avstraliya bilan yo'llarimiz 2014 yil Myanmar mezbonligidagi Osiyo kubogining guruh bosqichida kesishgan. O'shanda aynan hozirgi Ravshan Xaydarov boshqargan terma jamoamiz guruh bosqichining so'nggi turida "yashil" qita vakillari bilan to'qnashgan. 66-daqiqada Stefan Mauk jamoasini oldinga olib chiqadi, onlayn jadvalda Avstraliyada 7, O'zbekistonda  4 ochko. Lekin umidni so'ndirmagan terma jamoamiz 82-daqiqada Zabihillo O'rinboevning goli evaziga muvozanatni tiklaydi. Yakunda O'zbekiston 5 ochko bilan to'plar nisbatiga ko'ra guruhdan ikkinchi o'rin bilan chiqadi, Avstraliya esa uyiga ravona bo'ladi. 

2014 yil. Myanmar. 

"B" guruhi. 3-tur. 

O'zbekiston - Avstraliya 1:1

Gollar: Zabihillo O'rinboev 82 - Stefan Mauk

O'zbekiston: Dilshod Hamroev, Akramjon Komilov, Ibrohim Abdullaev, Dostonbek Tursunov, Xurshid G'iyosov, Javohir Sohibov, Jamshid Boltaboev, Otabek SHukurov, Eldor SHomurodov, Dostobek Hamdamov, Zabixillo O'rinboev

Avstraliya bilan yoshlar miqyosidagi oxirgi bahs 2016 yil Baxraynda bo'lib o'tgan U-19 Osiyo kubogida kechgan. Jasur Abduraimov ustozlik qilgan terma jamoa "D" guruhida ikkinchi turdagi bahsda hamyurtlarimizning qo'li baland kelgan, 3:2. Gollarga Bobir Abdixoliqov, Doston Ibragimov (2ta) mualliflik qilgan. 

2016 yil. Baxrayn. 

"D" guruhi. 2-tur. 

Avstraliya - O'zbekiston 2:3

Gollar: Yulley Liam 63, Jorj Blakvud 90+3  - Bobir Abdixoliqov 29, Doston Ibragimov 40, 46

O'zbekiston: Umidjon Hamroev, Xojiakbar Alijonov, Islomjon Qobilov, Xushnudbek Avilov, Azizjon G'aniev, Jasurbek Yaxshiboev, Bobir Abdixoliqov, SHarof Muhitdinov, Oybek Rustamov, Jamshid Yusupov, Doston Ibragimov

SHu kungacha Avstraliyaga qarshi maydonga chiqqan yoshlarimiz 2 bor durang, 1 bor g'alaba qozongan. Ertangi g'alaba bu yoqimli ananani davom ettiribgina qolmay, O'zbekiston uchun beshinchi marotaba kichik mundial eshiklarini ochadi. Qizig'i shuki, O'zbekiston U-20 Jahon chempionatida oxirgi marotaba 2015 yil Ravshan Haydarov boshchiligida qatnashgan. Murabbiy bu ishni yana bir bor uddalashi talab etiladi. Barcha narsa bor. Hamyurtlarimizga mashaqqatli vazifada omad tilab qolamiz. 

Malumot uchun, O'zbekiston - Avstraliya uchrashuvi 11 mart kuni 19:00da "Bunyodkor" stadionida o'tkaziladi.