Jamoasini mag'lubiyatdan qutqarib qolgan darvozabon, xet-trikni rasmiylashtirgan hujumchi. Superligada 10-turning eng yaxshilari

Championat.asia sayti talqiniga ko'ra 10-turning eng yaxshi darvozaboni – Hamidullo Abdunabiev ("Olimpik")

 "Olimpik" bu tur Namanganda chempionat etakchilaridan biri "Navbahor" mehmoni bo'ldi va 1 ochko bilan ortga qaytdi. Uchrashuv davomida O'zbekiston olimpiya terma jamoasi posboni darvozasidan to'p olib chiqmadi va bir necha bor jamoasi joniga ora kirdi. Ayniqsa, uning so'nggi daqiqalarda ko'rsatgan seyvlari yodda qolarli bo'ldi. SHu tariqa Hamidullo Abdunabiev turning eng yaxshi posboni sifatida etirof etildi.

Championat.asia sayti talqiniga ko'ra 10-turning eng yaxshi murabbiyi – Maksim SHackix ("Paxtakor")

Maksim SHackix qo'l ostidagi "Paxtakor" bu tur "Andijon"ga safar uyushtirib, 3:1 hisobida zafar quchdi. Ko'plab futbolchilari safdan chiqqan "sherlar" "burgutlar" maydonida kutilganidan ko'ra ancha mazmunli o'yin ko'rsatib, haqli g'alabaga erishdi. Hatto mezbon muxlislar ham buni etirof etgan holda, mehmonlarni qarsaklar sadosi ostida kuzatib qo'yishdi. 

Championat.asia sayti talqiniga ko'ra 10-turning eng yaxshi futbolchisi – Bobir Abdixoliqov ("Nasaf")

"Nasaf" ushbu tur o'z maydonida "Lokomotiv"ni qabul qilib, 3:0 hisobida g'alaba qozondi. Mezbonlar hujumchisi 8, 49, 68-daqiqalarda to'p kiritib, jamoasiga chiroyli g'alaba keltirdi. SHu tariqa Bobir Abdixoliqov golsiz seriyasiga yakun yasadi va deyarli 4 yildan so'ng Superligada gol urdi. 

Championat.asia sayti talqiniga ko'ra 10-turning eng chiroyli goli muallifi – Husayn Norchaev ("Neftchi")

"Neftchi" mazkur tur Toshkentda "Bunyodkor" mehmoni bo'ldi. Farg'onaliklar hujumchisi Husayn Norchaev ushbu bahsda 1 ta gol urdi va 2 ta golga assistentlik qildi. Uning urgan golidagi hujum juda chiroyli tashkil etildi va bu vaziyatda forvardning harakatlari haqiqiy hujumchilarga xos ravishda edi.