Islom Ismoilov: "Turon" Superligada qolish uchun emas, yuqori o'rinlar uchun intiladigan jamoa sifatida shakllanadi"

"Bugungi uchrashuvga to'xtaladigan bo'lsak, uchta o'yindan beri hisobda oldinda borayotib oxirgi daqiqalarda gol o'tkazib yubormoqdamiz. SHuning hisobiga juda ham kerakli bo'lgan ochkolarni yo'qotmoqdamiz. Bunday holat so'nggi paytlarda ko'p bor kuzatilmoqda. Futbolchilarga diqqat etibor etishmayaptimi yoki boshqa sababmi bilmadim. Zaxiradan maydonga tushayotgan futbolchilarimiz oqibatida shunday muammolar kelib chiqyapti. Ikki jamoa ham bugun hujumkor o'yin ko'rsatdi. Himoyada harakat qilgani yo'q. Dastlabki 20 daqiqa juda tez o'tib ketdi. "SHo'rtan"da ham, bizda ham gol urish uchun ko'plab vaziyatlar yuzaga keldi. Durang adolatli natija bo'ldi deb o'ylayman. Ikki jamoa g'alaba uchun harakat qildi, ochko suv va havodek zarur edi. 

Etirozlar hamisha bo'ladi, o'yindan qoniqmaymiz. Murod Ismoilov ham murabbiy sifatida o'yin davomida o'zlarini fikrlarini bildiradilar. Bilasizmi, jamoamizda zaxira o'rindig'i juda tor. Himoya chizig'imiz 7-8ta uchrashuvdan beri o'zgarmasdan o'ynamoqda. O'yinlarni orasi zich joylashgan. SHuning hisobiga istaymizmi yo'qmi futbolchilarda charchoq alomati seziladi. Oxirgi marotaba to'liq tarkib bilan uchrashuvni o'tkazganimizni eslay olmayman. Masalan bugun Doniyor Ismoilov to'rtta sariq kartochka olganligi sabab maydonga tusha olmadi. "Neftchi" bilan kechadigan bahsda ham xuddi shu muammo. Ularning o'rnini to'ldira oladigan futbolchi yo'q. Bunday darajadagi o'yinlarga ko'p yoshlar tayyor emas. 

Zaxiradan o'yinga qo'shilgan yosh futbolchimiz juda qo'pol xato qildi. Ularga o'yinni o'z tomonimizga og'dirishimizni aytdik. Himoyalanishda xatoga yo'l qo'ydi, hech qachon bunday himoyalanish kerak emasdi. Bitta xato sabab "SHo'rtan" foydalanib gol urib ketdi.

Aksariyat matbuotlarda va xabarlarda "Neftchi"ni Superligaga olib chiqib qo'yishdi. Lekin, esdan chiqarmaslik lozim oldinda "SHo'rtan", "Dinamo" kabi jamoalarda ham imkoniyat bor. CHunki, mana shu to'rt jamoa chempionlik uchun harakat qilmoqda. Bizning maqsadimiz o'zgarmaydi. Oxirgi daqiqaga qadar kurashamiz. Mehnat qilamiz. Qaerdadir ochko yo'qotyapmiz, demak kam ishlayapmiz. Jamoamiz yosh barcha narsa bosqichma-bosqich amalga oshirilyapti. "Turon" Superligada qolish uchun emas, yuqori o'rinlar uchun intiladigan jamoa sifatida shakllanadi. 

Mashg'ulotlarda asosiy etiborni jismoniy holatni tiklashga qaratmoqdamiz. Futbolchilarga og'ir yuklamalarni bermayapmiz. O'yin tugashi bilan murabbiylarimiz boshchiligida tiklanish mashqlarini boshlab yubordik. Ularni keyingi bahsga tiklash uchun maksimal darajada harakat qilyapmiz. Sunnat Ermatovni sariq kartochka olmasligini har kuni takidlab keldik. Markaziy chiziqda katta muammo bor. CHetda turib ko'p narsani o'ylashingiz mumkin, maydonda esa hammasi boshqacha bo'lib ketadi. 

"Neftchi" bilan uchrashuv ko'p narsaga oydinlik kiritib beradi. Ular ham oxirgi turlarda yaxshi o'yin ko'rsatmoqda. Ancha vaqtdan beri mag'lubiyatga uchrayotgani yo'q. Finaldan kam bo'lmaydi deb o'ylayman. Ikki jamoani o'rtasida farq ikki ochko. Raqibni "Dinamo" bilan o'yini kuzatamiz. CHempionlikka erishmoqchi bo'lsak qolgan barcha uchrashuvlarda g'alaba qozonishimiz kerak",- deydi Islom Ismoilov.