Ilyos Zeytullaev: "Toza o'yin vaqti bir taymdan biroz ko'proq bo'ldi"

"Yigitlardan minnatdorman. Biz ketma-ket ikkinchi uchrashuvda bir kishi kam bo'lib o'ynayapmiz. Bugun g'alaba qozonishni istagandik. Jamoam bugun yaxshi o'ynadi. Menimcha, toza o'yin vaqti bir taymdan biroz ko'proq bo'ldi, xolos. Raqib o'yin tempini tushira oldi. Bizga Turkiyadagi yig'inlarda vaqtni cho'zgan jamoalarga qarshi qo'shimcha choralar ko'rilishi haqida aytishgandi. Bu to'g'ri fikr deb o'ylayman. Umuman olganda, jamoam namoyish etgan o'yindan ko'nglim to'ldi" - deya fikr bildirdi Ilyos Zeytullaev.

- Chuqur himoyaga yotib oladigan jamoalarga qarshi o'yinlarda "Bunyodkor" qiynalmoqda. Shunday uchrashuvlarda jamoangizga nima etishmayapti? Masalan, ikkinchi bo'limda Temurxo'ja Abduxoliqov, Sardor Abdunabievlarni ham maydonga tashladingiz, ammo gol urilmadi...

- Har bir jamoa bunday raqiblarga qarshi o'ynashda qiynaladi. Biz birinchi bo'limda gol urib olganimizda o'yin umuman o'zgacha tus olgan bo'lardi. Shunday o'yinlardan yangi narsalarni o'rganishimiz va xulosa chiqarishimiz kerak. Futbolchilar bugun yaxshi harakat qilishdi, biz bugun mag'lub bo'lishimiz ham mumkin edi. Hech qaysi bir o'yinda g'alaba kafolatlanmagan. "Qizilqum" butun o'yin davomida bor-yo'g'i bitta vaziyatga ega bo'ldi.

- Urata ketma-ket o'yinlarni o'tkazib yuboryapti. Yaponiyalik legionerning o'rni qanchalik bilinmoqda?

- Uning o'rni bilinayotgani shubhasiz, biroq akademiyamiz tarbiyalanuvchisi Narimon Ahmadjonov juda yaxshi o'yin o'tkazdi. Narimon ketma-ket ikkinchi o'yindan buyon asosiy tarkibdan joy olmoqda. Taqdir har birimizga imkoniyatlar taqdim etadi. Narimon shunday imkoniyatlardan unumli foydalanib kelmoqda. Aziz To'lqinbekov ham o'zini yaxshi namoyish etmoqda.

- Temurxo'ja Abduxoliqov chetlatilgan vaziyat haqida to'xtalib o'tsangiz. Abduxoliqov bosh hakamga gapirgan gaplari uchun chetlatildimi? O'sha vaziyatda nima ro'y berganiga oydinlik kiritdingizmi?

- Futbolda bunday holatlar uchrab turadi. U bilan gaplashib ko'raman. U juda tajribali futbolchi va jamoa sardori. O'sha vaziyatda nima sodir bo'lganini aniqlashtirib olaman. Bugungi chetlatish hakamlarga ortiqcha etiroz bildirish kerak emasligi bo'yicha saboq bo'ladi.