Hakim Fuzaylov: "Birinchi taymning o'zida hisob yirik ko'rinish olishi kerak edi"

"G'alaba qozonish har doim ham yoqimli. Ammo jamoamiz yana katta ustunlikka erishib, ko'plab vaziyatlarni ko'kka sovurmoqda. Birinchi taymning o'zidagi vaziyatlarimizni golga aylantira olganimizda, hisob yirik ko'rinishga kelardi. Yigitlarda ozgina sovuqqonlik etishmayapti, nazarimda. Bu borada mashg'ulotlarda qattiq mehnat qilamiz, boshqa yo'limiz ham yo'q.

Yigitlarga kurashganlari uchun va muhim 3 ochkoni qo'lga kiritganlari uchun tashakkur. Kurashishda davom etamiz. Birinchi bo'limdan farqliroq, ikkinchi bo'limda hisobdan kelib chiqib qarshi hujumda o'ynagandek taassurot uyg'otgandir, lekin bu futbolchilarning ruhiyati bilan bog'liq hol. Nima bo'lgan taqdirda ham to'p bilan muomala qilish borasida ustunlik biz tomonda bo'ldi.

Haqiqiy "Buxorocha" derbiga guvoh bo'ldik. Ro'zimboy Ahmedov va Song Longjini bir vaqtda maydonga tushishini ko'rishimiz mumkinmi? Ha, mumkin! Turnirning asosiy pallasi yaqinlashmoqda, siz ularni bir vaqtda, maydonda albatta ko'rasiz", - dedi Fuzaylov.