G'arbliklar Eronni guruhda "ko'mib" ketmoqchi. "B" guruhi intrigalari

Yuqoridagi savolga bir necha soatdan so'ng javob olishimiz mumkin. 

Eron – AQSH (00:00 "Mahalla"/Match TV)

Uels – Angliya (00:00 Sport TV/Futbol 1)

Bir hamkasbimizning "Mundial studiya" efirida takidlashicha, g'arb davlatlari o'zaro kelishgan holda Eronni guruhda "ko'mib" ketmoqchi. Bu fikrga unchalik qo'shilmagan bo'lardim. To'gri, angliyaliklarning Eron va AQSH bilan ikki xil o'yin o'tkazgani shubhalarni uyg'otishi tabiiy, ammo guruhga nazar tashlaydigan bo'lsak, vaziyat jiddiy. Hattoki so'nggi pog'onada ketayotgan Uels termasida ham imkoniyat saqlanib qolgan. 

Angliya keyingi bosqichda kuchsizroq raqibga ro'baro' kelishi uchun guruhdagi o'rnini saqlab qolishga intiladi. Buning uchun esa autsayder Uels termasi mag'lub qilinsa bas. Qitadoshlarimiz esa Amerika Qo'shma SHtatlari bilan o'yinda kamida durang qayd etishlari lozim. Eronliklar mundialga g'alati kayfiyatda etib kelishdi. Bilishimizcha, terma jamoa azolari va rahbarlar orasida kelishmovchiliklar bor. Katta ehtimol birgina Keyrush futbolchilarga motivaciya berayotgan bo'lsa kerak. Eron o'tgan tur Uels bilan o'yinda iroda ko'rsata oldi. AQSH esa yulduz futbolchilar faktori etiboridan o'yinda favorit sifatida qaralmoqda. 

Jamoalar bungacha ikki bor to'qnash kelishgan. Mundial-98 da qitadoshlarimiz 2-1 hisobida zafar quchishgan, 2000 yilda bo'lib o'tkan o'rtoqlik o'yinida murosa ko'chasi tanlangan. Uchinchi to'qnashuvda qaysi tomon g'olib bo'lishini bir necha soatdan so'ng bilib olamiz.

Sizningcha, "B" guruhidan qaysi jamoalar keyingi bosqichga yo'l olishadi?

Jaloliddin Xalilov