Eron FF prezidenti: "Xavotirga o'rin yo'q, Keyrush Eronda qoladi"

Mehdi Taj matbuot vakillari bilan suhbatda shunday dedi: "Sizlarga bir gapni aytmoqchiman, Karlush Keyrush Osiyo Kubogi-2019 musobaqasida ham terma jamoada qoladi. Jahon chempionatidagi o'yinimiz shuni ko'rsatdiki, biz to'g'ri yo'ldan ketyapmiz. Yo'qsa terma jamoa mamlakatga qaytganida 7 ming ishqiboz aeroportga chiqmasdi".

"Milliy terma jamoa hamma narsadan ustun. Millionlab xalqimiz jahon chempionatini katta qiziqish bilan kuzatib bordi va futbolchilar ko'rsatgan o'yin barchaga manzur bo'ldi. Musobaqadagi ijobiy ishtirokdan keyin hammamiz bir xayolga bordik, bu o'yin bilan bemalol Osiyo Kubogida zafar qucha olamiz".

Malumki, portugaliyalik murabbiy JCH-2018da qanday natija qayd etilishidan qatiy nazar, mundialdan keyin Eron bilan xayrlashishini aytib o'tgandi. Ammo federaciya rahbari boshqa gapni gapiryapti.

"Xavotirga o'rin yo'q, Keyrush terma jamoada qoladi. Biz uning yangi shartnomasini yaqin kunlarda ko'rib chiqamiz. Mana ko'rasizlar, Osiyo Kubogiga hammamiz birgalikda boramiz", - deydi Mehdi Taj.

Malumot uchun, Karlush Keyrush 2011 yilning 4 aprelidan beri Eron termasini boshqarib kelmoqda. Uning qo'l ostida forslar ikki bor jahon chempionati, bir marta Osiyo Kubogida ishtirok etishdi.

SHu o'rinda bizga taalluqli savol javobsiz qolyapti: agar Keyrush haqiqatan Eronda qoladigan bo'lsa, unda O'zbekiston milliy terma jamoasini kim boshqaradi?

X.Xoliqov.