Eron bilan o'yinga 6 kun qoldi. Bugun o'rtoqlik uchrashuvi o'tkazamiz

Terma jamoamiz bugun "Bunyodkor" stadionida Tailand termasiga qarshi o'rtoqlik uchrashvi o'tkazadi. O'yin 20:00da boshlanadi.

Barcha muxlislarni bugungi o'yinda kutib qolamiz. Negaki qiziqarli bahs bo'lib o'tishi kutilmoqda. Tarkib shakllangan, futbolchilar esa o'yinga tayyor. Qolaversa, Tailandni mag'lub etsak Eronga ketish oldidan yigitlar ko'tarinki kayfiyatda bo'lishadi.

Tailand kecha Qozog'iston orqali Toshkentga etib keldi va kechki payt mashg'ulot o'tkazdi. Biz esa mana bir necha kundirki har kuni mashq qilyapmiz. Va bularning hammasi avvalo Eronni mag'lub etish uchun. 12 iyun kuni bo'lib o'tadigan Eron - O'zbekiston o'yini biz uchun hal qiluvchi ahamiyatga ega. Mabodo g'alaba qozonsak, kelasi yil jahon chempionatiga borish uchun yana bir qulay imkoniyaga ega bo'lamiz.

Bugungi o'yin orqali terma jamoa bosh murabbiyi Samvel Babayan Eronga qarshi o'ynaydigan tarkib hamda taktikani aniqlab olsa ajab emas. Qolaversa, bu o'yinda g'alaba ham bizga zarur. Eron o'rtoqlik o'yinida CHernogoriyani mag'lub etdi, biz Toshkentda o'ynab nima uchun Tailandni enga olmas ekanmiz.

O'ylaymizki, bugungi o'yin Eronga qarshi bahs oldidan katta repeticiya vazifasini o'tab beradi. Terma jamoamizda malakali murabbiylar ko'p. Biz bosh murabbiydan tortib murabbiylar shtabida faoliyat yuritayotgan Viktor Jalilov, Ravshan Haydarov, Grigoriy Kolovosvkiy, Deyan Jurjevich, Anvar Rashidov - xullas hamma murabbiylarga ishonamiz. Ular bo'lajak bahslarga jamoani munosib tayyorlab, ikkala o'yinni ham o'z foydamizga hal etish uchun futbolchilarni ruhlantira olishadi.