ECHL. CHorak finalda xet-trik qilgan besh azamat

Biz musobaqaning aynan shu bosqichida bitta o'yinda kamida 3ta gol urgan futbolchilar haqida malumot berishga qaror qildik.

1998 yil mart oyida "Yuventus" klubi chorak finalda Kievning "Dinamo" klubiga qarshi to'qnash kelgan. Birinchi bahs Turinda bo'lib o'tgan va 1:1 hisobida tugagandi. Javob o'yini esa Filippo Inzagining benefisiga aylanib ketgan. "Pippogol" 100 mingdan ziyod tomoshabin kelgan o'yinda kievliklar darvozasiga uchta gol urishga erishgan. O'sha yil "Yuve" finalgacha borib "Real"ga mag'lub bo'lgandi.

18 mart 1998
"Dinamo Kiev" - "Yuventus" 1:4
Gollar: Rebrov 54 - Inzagi 29, 65, 73, Del Pero 87

Oradan ikki yil o'tib chorak finalda xet-trik kuzatilgandi. "Valensiya" yarim himoyachisi Xerard Lopez Rimning "Lacio" klubiga qarshi o'yinda 3ta gol urishga erishgandi. Javob bahsida "Lacio" 1:0 hisobida zafar quchgandi. Ispaniya klubi o'sha mavsumda finalga qadar etib borgan va "Real"ga yutqazib qo'ygandi.

05 aprel 2000
"Valensiya" - "Lacio" 5:2
Gollar: Angulo 2, Xerard Lopez 4, 40, 80, Klaudio Lopez 90+1 - Simeone Inzagi 28, Salas 87.

2003 yilgi chorak finalida sueprto'qnashuv bo'lib o'tgandi. MYU va "Real" o'rtasidagi ilk o'yin Madridda bo'lib o'tgandi - 3:1. "Old Trafford"dagi javob o'yini haqiqiy spektaklga aylanib ketgandi. Maydon egalarining to'rtta goliga "galaktikos" safida braziliyalik Ronaldoning bir o'zi uchta gol bilan javob bergandi - 4:3. "Real" o'sha yil musobaqaning yarim finalida ikki o'yin natijasiga ko'ra "Yuventus"ga imkoniyatni boy berib qo'ygandi.

23 aprel 2003
"Manchester Yunayted" - "Real Madrid" 4:3
Gollar: Van Nistelroy 43, Elguera 52 avtogol, Bekxem 71, 85 - Ronaldo 12, 50, 59

2010 yil chorak finalda "Arsenal" va "Barselona" klublari to'qnash kelishgandi. Londonda o'tgan birinchi uchrashuvda tomonlar jangovor durang qayd etishgandi - 2:2. Kataloniyada tashkil etilgan javob bahsi esa maydon egalari hujumchisi Lionel Messining benefisiga aylanib ketgandi. Argentinalik futbolchi o'sha oqshom "kanonirlar" darvozasiga 4ta gol urgandi. "Barselona" o'sha yarim finalda bo'lajak chempion "Inter"ga yutqazib qo'ygandi.

06 aprel 2010
"Barselona" - "Arsenal" 4:1
Gollar: Lionel Messi 21, 37, 42, 88 - Nikolas Bendtner 18

Nihoyat ushbu maqola yozilishiga sababchi bo'lgan xet-trikka ham etib keldik. Madridning "Real" klubi chorak finalning birinchi o'yinida Germaniyaning "Volfsburg" klubi mehmoni bo'lib ko'pchilik uchun kutilmaganda 0:2 hisobida mag'lubiyatga uchradi. Javob bahsida esa Krishtianu Ronaldu birinchi bo'limda ikkita, ikkinchi bo'limda bitta gol urib "Qirollik klubi"ga yarim final yo'llanmasini olib berdi - 3:0. Yarim finalda "Real" Angliyaning "Manchester Siti" klubiga qarshi o'ynaydigan bo'ldi.

13 aprel 2016
"Real Madrid" - "Volfsburg" 3:0
Gollar: Krishtianu Ronaldu 15, 17, 77

Narzulla Saydullaev tayyorladi