Dinamo: Tachmurod Agamurodov maslahatchi-murabbiy sifatida ishlaydi

Joriy murabbiylar shtabi qo'l ostida esa klubning ikkinchi davra startidagi natijalari qoniqarsiz ko'rinish oldi. SHu bois murabbiylar shtabiga tajribali mutaxassis lozim edi.

O'tgan haftada O'zbekiston Futbol Federaciyasida Oliy Liga klublari vakillari ishtirokida yig'ilish bo'lib o'tdi. O'zbekiston Futbol Federaciyasi Prezidenti Mirabror Usmonov o'z nutqida mamlakatimizda futbolni rivojlantirish bo'yicha umumiy masalalarni qayd etib o'tdi. Xususan, o'zbek futbolida o'z o'rniga ega bo'lgan Samarqand futboli haqida iliq fikrlar bildirib, viloyat futboliga etiborsiz emasligini aytdi. Dinamo bosh murabbiyi Ravshan Haydarovning ikkinchi davra oldidan terma jamoaga jalb etilgani bois, klubga tajribali murabbiy kadrlar masalasida amaliy yordam berish lozimligi haqida fikr bildirdi.

Kuni kecha esa Dinamo murabbiylar shtabida o'zgarish yuz berdi. Mamlakatimiz futbolida o'z nomiga ega bo'lgan tajribali murabbiy Tachmurod Agamurodov Dinamo jamoasida ish boshladi. Taniqli mutaxassis klubda maslahatchi-murabbiy sifatida faoliyat yuritadi.

Malumot o'rnida, Dinamo so'nggi yillardagi eng yaxshi natijasini ushbu mutaxassis qo'l ostida 2007 yilda erishgan bo'lib, o'shanda jamoa 5-pog'onadan joy olgandi.