"Dinamo" Avaz Agaliev, Otabek Narzullaev va SHerzod Jalilov bilan 1,5 yillik shartnoma tuzdi

Oldinroq tarkibga Akmal Xolmurodov (“So'g'diyona”), Abbosbek Jumaqulov, Suhrob Izzatov (“Bunyodkor”), Pavel Purishkin (“Metallurg”), Dilmurod Karimov (“So'g'diyona”) singari futbolchilar kelib qo'shilgani va ular bilan 2019 yil yakunigacha 1,5 yillik shartnoma imzolangani haqida xabar bergandik.

Davralar oralig'ida “Dinamo” klubi yana uch nafar yangi futbolchi bilan shartnoma imzoladi. Kuni kecha Samarqandda bo'lgan Avaz Agaliev (“Neftchi”), SHerzod Jalilov (“Zomin”) va Otabek Narzullaev (“SHo'rtan”) singari futbolchilar “Dinamo” bilan 1,5 yillik – 2019 yil yakunigacha shartnoma imzoladi.

Avaz Agaliev uchun “Dinamo” begona klub emas. CHap qanot himoyachisi 2013-2015 yillar davomida “Dinamo” safida to'p surgan edi. 30 yoshli futbolchi joriy yilning dastlabki yarmini esa Farg'onaning “Neftchi” klubi safida o'tkazdi.

SHerzod Jalilov o'tgan yillar davomida Jizzaxning “So'g'diyona” va “Obod” klubi safida to'p surgan bo'lsa, 27 yoshli futbolchi joriy yilning dastlabki qismini “Zomin” jamoasida o'tkazdi.

Otabek Narzullaev ham 2007-2008 yillar davomida “Dinamo” safida to'p surgan. So'nggi mavsumlarni esa G'uzorning “SHo'rtan” klubi safida o'tkazayotgandi. Tajribali yarimhimoyachi bilan ham 2019 yil yakuniga qadar shartnoma imzolandi.

Eslatib o'tamiz, “Dinamo” Pro-Liga uchinchi davrasiga tayyorgarlikni 9 iyul kunidan CHimyon tog'li hududida boshlaydi.