Davron Fayziev: Biz taslim bo'lmay, oxirigacha kurashamiz

- Avvalambor, Pro-Ligadagi dastlabki g'alaba bilan barcha muxlislarimizni tabriklayman. Ko'rganingizdek, bugungi g'alaba oson emas, ancha asabiy ruhda qo'lga kiritildi. Asabiy deganimga sabab, vaziyatlardan foydalanish bobida ko'p imkoniyatlarni ko'kka sovurayapmiz. Juda asabiylashayotganim sababi, futbolchilarimiz o'z mehnatlari qadriga etmay, shuncha vaziyatlardan boy berishmoqda. Vaqt esa o'tmoqda, bizni og'ir o'yinlar kutayapti. Bugun nimaning ustidan ishlashimiz lozimligi yana ko'rindi. Asosiysi g'alabaga erishdik, yigitlarga rahmat, umid qilamanki, omadsizlik ortda qolib, bu muvaffaqiyatlari o'yinlarimizning boshlanishi bo'lib xizmati qiladi.

- Oldinda “Dinamo”ni “Qizilqum”ga qarshi muhim kubok uchrashuvi kutib turibdi. Bugun Mirkomil Lokaev, qolaversa yana qator himoyachilar jarohat olganligini inobatga olsak, bu vaziyatdan qanday chiqib ketmoqchisiz?

- Afsuski, tarkib borasida muammolarimiz bor. Aytganingizdek, ayniqsa himoya chizig'i boshog'riq bo'lib turibdi. Umid qilamanki, Lokaevning jarohati jiddiy bo'lib chiqmaydi. Bunyod Isroilov ham “Qizilqum”ga qarshi o'yingacha shay holatda bo'lishi kerak. Qolgan futbolchilarimizning ham o'sha o'yinga qadar bo'lgan holatiga katta etibor beramiz. “Qizilqum” Superliga so'nggi turida amaldagi chempion “Lokomotiv”ni safarda mag'lub etishiga sal qoldi. Bu o'yinda jamoaning kuchi yaqqol ko'rindi. Raqib kuchli futbolchilar, yaxshi legionerlarga ega bo'lsada, “Dinamo” osonlik bilan taslim bo'ladigan jamoa emas. Muxlislarimiz bizning 12-o'yinchimizdek qo'llab-quvvatlashsa, biz har qanday holatda ham g'alaba uchun kurashamiz.

Usmon IBODOV yozib oldi.