Coca Cola Superligada bugun 11-tur boshlanadi. Baqoev Abramovga qarshi
20 avg 2020 09:35
Yangiliklar

Coca Cola Superligada bugun 11-tur boshlanadi. Baqoev Abramovga qarshi

Bugun Coca Cola Superligasining 11-turidan o'rin olgan dastlabki uchrashuvi bo'lib o'tadi.

Turning ilk uchrashuvi TTZ dahasidagi "Lokomotiv" stadionida bo'lib o'tadi. Unda Ulug'bek Baqoev boshchiligidagi "So'g'diyona" klubi Vadim Abramov boshqarayotgan "Bunyodkor"ni qabul qiladi. O'tgan turda Jizzax klubi "Nasaf"ga 0:3 hisobida mag'lub bo'ldi, "Bunyodkor" esa "Metallurg"ni 2:0 hisobida taslim qildi.

Coca Cola Superliga. 11-tur
20 avgust, payshanba
19:00 - SO'G'DIYONA – BUNYODKOR
Hakamlar: SHerzod Qosimov, Abduhamidullo Rasulov, Aleksandr Sidorov, Farruh Yansupov
Nazoratchi: Andrey Klepikov
Komissar: SHohruh Said

Bu jamoalar hozirga qadar O'zbekiston chempionatida 20 bor to'qnash kelishgan. Katta ustunlik "Bunyodkor" tomonida. "Qaldirg'ochlar" 15ta uchrashuvda g'olib bo'lishgan. Uchta bahsda durang qayd etilgan va 2ta o'yinda "So'g'diyona"ning qo'li baland kelgan.

O'zaro oxirgi 3ta o'yinda "Bunyodkor" "So'g'diyona" ustidan g'alaba qozona olmagan - 2ta durang, 1ta mag'lubiyat.

Bu mavsum Superligada "So'g'diyona" ikkita turdan buyon raqiblari darvozasiga gol ura olmayapti. "Bunyodkor"ning mag'lubiyatsiz seriyasi 5ta o'yinga etdi.

Ayni paytda "Bunyodkor" musobaqa jadvalida 3-o'rinda bormoqda, "So'g'diyona" esa 9-pog'onani egallab turibdi.