“Buxoro”dagi faoliyati, tojikistonlik legionerlarning kamayishi sababi, Abramovning uslubi – Superligada o'ynagan Fatxullo Fatxulloev bilan suhbat

Yaqinda ushbu o'yinchi bilan bog'lanib intervyu tashkil qildik va ayrim savollarga javob oldik.

- Dastlab, “Buxoro” jamoasidagi qisqa faoliyatingiz haqida to'xtalib o'tsangiz...
- O'tgan yili “Istiqlol” bilan xalqaro maydonda muvaffaqiyatsiz ishtirok etdik. Rahbariyat tomonidan berilgan vazifani bajara olmadik. Avval OCHLga, so'ng OFK kubogiga chiqishda raqiblarimizga imkoniyatni boy berib qo'ydik. Yozda meni Muhsin Muhammadiev jamoasiga takli qildi. Vaziyat og'ir ekanligini, “Buxoro”ni Superligada saqlab qolishimiz uchun yordam berishimni takidladi. Haqiqatdan ham men kelganda klub turnir jadvalining quyi pog'onalarida yurardi. Taklifga rozilik bildirdim. Ikkinchi davrada muhim va qimmatli ochkolarni ishladik. Maqsadimizga erishdik.

- Jamoani tark etishingiz nima bilan bog'liq?
- SHartnomam mavsum so'ngigacha mo'ljallangandi. Jamoa uchun bor kuchim bilan harakat qildim. Yordamimi tekkan bo'lsa xursandman. Doim ohirgacha kurashishga o'rganganman. Inson kurashdan to'xtab qolsa muvaffaqiyatga erisha olmaydi. Hammasi uchun klubdagi barcha xodimlarga minnatdorchilik bildiraman.

- Murabbiy Muhsin Muhammadievni juda yaxshi taniyisiz, bilasiz. U bilan oldin “Istiqlol” jamoasi va Tojikiston terma jamoasida birga ishlagansiz. Biroq, hozirda uning boshqaruvidagi jamoa Superliganing uchta turini omadsiz yakunladi. Barcha bahslarda yirik hisobda mag'lubiyatga uchradi. Mutaxassisni istefoga chiqarilishi haqida ham gaplar tarqaldi...
- Muhsin Muslimovich hurmatga loyiq inson va murabbiy. Uning tajribasi katta. Futbolchilik faoliyatida ham Rossiyaning kuchli klublarida o'ynagan. “Rubin” jamoasida sport direktori lavozimida ham o'zini ko'rsata olgan. O'tgan yili aynan murabbiyning tajribasi hisobiga “Buxoro” elitada qoldi. Mening fikrimcha taqvim jamoa uchun og'ir keldi. Uchta turni ikkitasi “Paxtakor” va “Lokomotiv”ga qarshi o'tdi. SHuni ham unutmaslik kerak.

- 2019 yilgi OCHL saralash bosqichida AGMKga ro'baro' kelgansiz. Matbuot anjumanida u qadar ko'p ham gapirmagansiz. Biroq, ertasi kuni o'yinda chiroyli gol urgandingiz...
- Ha, to'g'ri payqadingiz. “Istiqlol” bilan Olmaliqda mehmon bo'lganmiz. Uchrashuvni yaxshi boshlaganmiz, tezkor gol ham urgandik. Raqib o'z maydonida harakat qilgani ularning g'alabasini taminladi. Goldan so'ng boshqacha ishtiyoq bilan to'p tepishgandi.

- “Xo'jand” jamoasiga sizni kim taklif qildi ? Murabbiy Nikola Lazarevichmi yoki rahbariyat?
- Jamoa boshlig'i Murod Umarov menga qo'ng'iroq qildi va jamoaning maqsadlari yuqori ekanligini aytdi. Menga ishonayotganligini, tajribam borligini tushuntirdi. OFK kubogi guruh bosqichiga yo'llanmani qo'lga kiritdik. “Xo'jand”dagilar menga iliq munosabatda bo'lishdi. Bundan xursand bo'ldim.

- Jamoada to'rt nafar o'zbekistonlik futbolchilar o'ynamoqda. Ular bilan munosabatlaringiz qanday?
- Ular bilan o'rtamizdagi aloqalar juda yaxshi. Bir-birimiz bilan alo darajada chiqishib ketdik.

- Tojikiston chempionatida favorit va etakchi “Istiqlol” va “Xo'jand” ekanligi aniq. Ushbu jamoalarga chempionlik poygasida yana kimlar jiddiy qarshilik qilishi mumkin?
- Aslida kuchsiz jamoa yo'q. Fikrimcha, “Xatlon”, CSKA-Pomir, “Ko'ktosh” jamoalari raqobatda biz bilan tenglasha oladi deb o'ylayman.

- Bilamizki, avvalari tojikistonlik futbochilarni Evropa, Rossiya klublarida ko'p ko'rardik. Rashid Rahimov Ispaniyaning “Valyadolid” klubida to'p tepgandi, Vitaliy Levchenko Ukraina klublarida harakat qilgan. Hozirda nima uchundir bunday holatlar kamaygandek...
- Yo'q, kamaygan deyish noo'rin. Masalan, Parviz Umarboev “Lokomotiv” Plodiv, Nuriddin Davronov “Borneo” Indoneziya, SHahrom SHamsiev “Rubin” Rossiya, Davronjon Ergashev “Bunyodkor”, Farhod Vosiev “Nefteximik” Rossiya kabi klublarda o'ynab kelishmoqda.

- O'zbekistonlik murabbiylardan kimning uslubi sizga yoqadi?
- Menga ko'proq Vadim Abramovning qo'llayotgan o'yin uslubi yoqadi.

Abdulaziz Iskandarov suhbatlashdi.