Ro'ziqul Berdiev: "Oxirgi zarbani berishda sovuqqonlik etishmadi"

- O'yin haqida fikringiz?

- Raqib bugun zich himoyalandi va bu bizga qiyinchilik tug'dirdi. Lekin g'alaba qozona olmaganimiz uchun o'zimiz aybdormiz. Oxirgi zarbani berishda futbolchilarimizga sovuqqonlik etishmadi. Raqib esa gol urib olgach himoyaga katta etibor qaratdi.

- Aytib o'tganingizdek, "Andijon" bugun yaxshi himoyalandi.

- Baribir hammasi o'z qo'limizda edi. Lekin nimayam derdim, durang qayd etildi. Superligamizda kutilmagan natijalar ko'p kuzatilyapti va chempionat shunisi bilan qiziq o'tyapti.

-  Jamoaga taklif etilgan legionerlar bo'yicha ijtimoiy tarmoqda turli gaplar aylandi.

- Bu haqda oldingi o'yindan keyin ham aytgandim. Viza bilan bog'liq masalalar sabab legionerlarning safimizga qo'shilishi biroz kechikdi. Nasib qilsa ular tezda jamoamizga kirishib ketadi.

- Bu mavsum har ikki jamoa o'z omadini Osiyo maydonlarida sinab ko'radi.

- Ha, shunday. Biz Elit Osiyo chempionlar Ligasida, "Andijon" esa OCHL 2da ishtirok etadi. Bizning maqsadimiz g'olib chiqish emas, balki munosib ishtirok etish. Imkon qadar yaxshi taassurot qoldirishga harakat qilamiz. Bu yil Superliga chempionligini o'zimizda saqlab qolishimiz kerak.

- "Nasaf" safida debyut qilgan Adenis Shala o'yinini qanday baholaysiz?

- Bu futbolchi mashg'ulotlarimizda faqat ikki marta qatnashdi. Uning kuchli tomonlari bor va tezkor o'yinchi. Keyingi uchrashuvlarda Shala o'zini ko'rsatishiga umid qilamiz.