Vitaliy Levchenko: "Biz ham "Qo'qon-1912"ga yordam qildik"

- Dastlab o'yin haqida fikringiz?

- Chiroyli futbol bo'ldi. Har ikki jamoa o'zining eng yaxshi o'yinini ko'rsatishga harakat qildi. Afsuski, maydon holati zo'r emasligi ko'p holatlarda pand berdi. Shu bois kombinacion futbol o'rniga yakkakurashlarga boy o'yin ko'rdik. G'alaba uchun yigitlarga rahmat aytaman. Endi keyingi bahsga hozirlik ko'ramiz.

- Kojo va Nimeli o'yinini qanday baholaysiz? Ular ikkita uchrashuvdan beri jamoaga kirishib keta olishmayapti.

- Mavsumning ikkinchi yarmiga tayyorgarlikni boshlaganimizdan so'ng oradan birmuncha vaqt o'tib ular mashg'ulotlarga qo'shildi. Yig'inning boshidan biz bilan bo'lgani yo'q. Shuning uchun bu ikki futbolchiga vaqt kerak deb hisoblayman. Kojo bugun yaxshi harakat qildi, faqat bir vaziyatda birga-bir gol urishi kerak edi, ammo to'pni sherigiga uzatishni maqul kurdi. Vaholanki o'zi qulay holatda turgandi. Vaqt o'tishi bilan yangi futbolchilar jamoaga kirishib ketadilar.

- O'z paytida "Neftchi" sobiq ittifoq ikkinchi ligasida o'ynardi, Qo'qonda esa "Avtomobilchi" jamoasi bo'lardi. Evgeniy Matvienko degan futbolchi Qo'qonda yaxshi o'ynagan paytda Sarkisyan uni yana "Neftchi"ga qaytargandi. Chunki o'shanda Qo'qon yordam qilmaganida "Neftchi" pastga tushib ketgan bo'lardi. Endi bo'lsa "Qo'qon-1912" og'ir kunlarni boshdan kechiryapti va "Neftchi" hozir yordam bersa bo'ladi-ku. Siz bunga nima deysiz?

- Savolingiz uchun rahmat. Biz ham Shohruh Gadoevni "Qo'qon-1912"ga berib, sizlarga yordam qildik. Bugun u darvozamizga gol urdi va qo'shimcha taymlarda to'p kiritmaganimizda o'yin durang bilan yakun topardi. Biz ham qo'ldan kelgancha yordam beryapmiz. Biz bitta viloyat jamoasimiz va buni tushunaman. Agar birorta futbolchimiz Qo'qonda o'ynashni xohlasa, muammo yo'q, biz har qanday yo'lni sinab ko'ramiz.

- Bugungi g'alaba orqali "Neftchi" yana chempionlik poygasiga qaytdimi? Keyingi o'yin "Nasaf" bilan kechadi va bu bahsda ham jamoa o'zini ko'rsata oladimi?

- Biz har bir o'yinda g'alaba qozonishga harakat qilamiz. Hozir eng muhimi tiklanib olish, chunki "Nasaf"ga qarshi bahs atigi 4 kundan keyin bo'ladi. Biz murabbiylar jamoani tayyorlash uchun bor kuchni ishga solamiz.

- Jamoaning kayfiyati juda sust ko'rinyapti. Nimaga bunday bo'lyapti? Bu "Nasaf" bilan xalaqit bermaydimi?

- Aytganimdek, o'yinlar oralig'i qisqa va tezroq tiklanishga to'g'ri kelyapti. Avgust oyining o'zida 6ta o'yin o'tkazamiz. "Bunyodkor" bilan yaxshi o'ynab yutqazdik, bugun esa og'ir o'yinda g'alaba qozondik. Futbol shunisi bilan qiziq.

- Abror Ismoilovning jarohati jiddiy emasmi?

- O'ylaymanki, u keyingi uchrashuvga tayyor bo'ladi. Uning tishida og'riq bor va tezroq tuzalishiga umid qilamiz.