Bugun London derbisi yoki Angliya "lagani" uchun bahs
06 avg 2017 15:31
Yangiliklar

Bugun London derbisi yoki Angliya "lagani" uchun bahs

Bugun Angliyada futbol mavsumiga start beriladi.

Mavsum Angliya Superkubogi yoki inglizlar sevib aytadigan "FA Community Shield" bahsi bilan boshlanadi. Bu safar mavsumdagi ilk sovrin uchun ikki London klubi - "Arsenal" va "CHelsi" kurash olib boradi. Ularning biri Angliya Premer-ligasida g'olib bo'lgan bo'lsa, ikkinchisi esa mamlakat Kubogida zafar quchdi.

Laganga o'xshash sovrin uchun o'yin 1908 yildan beri o'tkazib kelinadi. Musobaqaning ilk g'olibi "Manchester Yunayted" bo'lgan. "Turnirning amaldagi g'olibi ham "Manchester Yunayted" hisoblanadi. Ular 2016/17 mavsum oldidan Angliya Kubogi g'olibi sifatida ushbu musobaqada ishtirok etib, "Lester Siti"ni 2:1 hisobida taslim etishgan.

Ushbu "laganlar"ning eng ko'pi ham aynan "Manchester Yunayted" muzeyida. "Qizil iblislar" ushbu sovrinni 21 marotaba boshlari uzra baland ko'tarishgan.

Bu yil ushbu sovrinni London jamoasi yutadi deyish mumkin. CHunki "Arsenal" va "CHelsi" London jamoalari hisoblanadi. Ushbu ikki klub 191 marotaba o'zaro bahs o'tkazishadi. Statistika "to'pchilar" tomonida. Ular hisobida 74 ta g'alaba mavjud, duranglar soni esa 54 ta, qolgan 62 ta o'yinda "aristokrat"larning qo'li baland kelgan. To'plar nisbati bo'yicha ham "Arsenal" ustun (266-249).

"Arsenal" hozirgacha 21 marotaba ushbu sovrin uchun kurashgan bo'lsa, ular 14 marotaba sovringa ega chiqishgan. So'nggi marotaba bu 2015 yilda sodir bo'lgan.

"CHelsi"ning ko'rsatkichlari esa kamtarona. 11 ta finalning 7 tasi qo'ldan boy berilgan. So'nggi muvaffaqiyat 2009 yilda amalga oshgan.

London klublari ushbu uchrashuvdan tushgan pulni Kensington tumanidagi yong'inda jabrlanganlarga berishga qaror qilishdi. Ushbu yong'in 79 kishini bu dunyodan olib ketdi. Taxminlarga ko'ra, "Uembli" uchrashuvi 1,25 mln. funt daromad olib kelishi kerak.

Taxminiy tarkiblar

"Arsenal": CHex, Xolding, Koselni, Monreal, Oksleyd-CHemberlen, Remsi, Jaka, Kolashinac, Uolkott, Ozil, Lyakazett.

"CHelsi": Kurtua, Aspilikueta, David Luis, Kexill, Mozes, Fabregas, Kante, Alonso, Villian, Pedro, Morata.

O'yindan olidingi fikrlar

Arsen Venger ("Arsenal"): Superkubok biz uchun - Angliya Kubogi finalini takrorlash va o'yin amaliyotiga muhtoj bo'lganlarga uni berish imkoniyati. Ozil to'liq kuch bilan shug'ullanmadi, ammo hammasi joyida bo'ladi. Koklenda jarohat bor, Sanches va Mustafi esa yaqinda klub tasarrufiga qaytishdi, ular haqida bir narsa deya olmayman.

Antonio Konte ("CHelsi"): Azar va Bakayoko jismoniy formani tiklashda o'sishga erishishmoqda, ammo ular mavsum boshiga tayyor emaslar. Eden va Bakayoko operaciya qilingan. Oyoqqa turish uchun esa vaqt kerak.

Angliya Kubogi finalida "Arsenal"ga yutqazish alamli bo'ldi. Endi bizda yana bir imkoniyat bor va "Arenal" kuchli jamoa ekanligini bilamiz. Mavsumni g'alaba bilan boshlamoqchimiz.

O'rtoqlik uchrashuvlari biz uchun yakunlandi. Bu rasmiy bahs va mavsumdagi ilk sovrin uchun o'yin.

"CHelsi" va "Arsenal" yaxshi formada emas, chunki mavsumni endi boshlayapmiz. Ammo uchrashuvni yuqori tezlikda o'tkazib, mavsumga tayyorlanib olmoqchimiz.

Asosiy tarkib borasida qaror qabul qilishim uchun menda yana bir kun bor.