Bugun futbol. "Navbahor" - "Paxtakor"

Birinchi bosqichni peshqadam sifatida tugatgan "Paxtakor" bugun Namanganda mehmon bo'ladi.

Aytish mumkinki, bu o'yin turning markaziy bahsi bo'ladi. Birinchi bosqichda "Navbahor" o'z uyida "Paxtakor"ni 1:0 hisobida mag'lub etgandi. Jamoa o'tgan yil ham "Paxtakor"dan ustun kelgan. SHota Arveladze hozircha Namanganda zafar qucha olgani yo'q.

Bugun ham qiziqarli bellashuv ko'rsak ajab emas. Kim g'olib chiqishini esa oldindan aytish qiyin. "Paxtakor" birinchi davrani 47 ochko bilan peshqadam sifatida tugatgandi, biroq "oltin ochkolar" tufayli ikkinchi bosqich oldidan 3-o'ringa tushib qoldi. "Navbahor" esa aksincha birinchi o'ringa ko'tarilib olgan. Jamoalar orasidagi farq 2 ochkoni tashkil etyapti.

"Navbahor" joriy mavsum hali o'z uyida yutqazgani yo'q. Mo'minjonov shogirdlari hisobida 9ta g'alaba va ikki durang bor. To'plar nisbati 20-2. Ko'rib turganingizdek, namanganliklar uyda atigi ikkita gol o'tkazishgan.

Bilasizmi? "Navbahor" oxirgi uchta g'alabasini faqat uyda qo'lga kiritgan. Bu jamoa "Buxoro", "Paxtakor" va "So'g'diyona"dan ustun kelgan.

"Paxtakor" safarda 5 marta g'alabaga erishgan, jamoa hisobida uchtadan mag'lubiyat va durang bor. "Paxtakor" safarda "Bunyodkor", "Buxoro" va "Navbahor"ga yutqazgan.

Bilasizmi? "Paxtakor" safardagi oxirgi ikki o'yinida bir mag'lubiyat va durang qayd etgan. Jamoa oxirgi marta 17-turda "Qizilqum"ni 2:1 hisobida engib qaytgan.