Brunu: "Endi MYU hech kimdan qo'rqmaydi"

Bugun Angliya Premer-ligasi 20-turida "Manchester derbisi" bo'lib o'tadi. "Old Trafford"da bo'lib o'tadigan o'yinda turnir jadvalida ikkinchi va to'rtinchi o'rindagi jamoalar o'zaro to'qnash keladi. Ayni paytda ular o'rtasidagi farq 4 ochkoni tashkil etmoqda. Bu o'yin ularni yanada yaqinlashtirishi mumkin. O'yin oldidan "qizil iblislar" yarim himoyachisi Brunu Fernandesh o'z fikrlari bilan o'rtoqlashdi:

"Hozir siz muxlislar va futbolchilarni o'yini to'g'riligiga ishontirayotgan jamoani ko'rayapsiz. Bu jamoa barcha o'yinlarda g'alaba qozonishga qodir.

Endi har bir o'yin oldidan biz hech kim bilan o'ynashdan qo'rqmasligimizni his qilyapmiz. Oldin bunday bo'lmagan. 

Ochig'i, muxlislar bizga ishonib jamoaga ishonch bildirmoqdalar. Lekin avvallari har bir qiyin o'yin oldidan hamma o'ylaydigan bir narsa bor edi: "Biz buni qila olamizmi?", ammo hozir muxlislarga, futbolchilarga va qolganlarga qarab biz har qanday jamoaga to'qnash kelishga tayyor ekanimizni his qilyapmiz", – dedi "Manchester Yunayted" yarim himoyachisi.

Birinchi davrada Erik ten Hag shogirdlari "Manchester Siti"ga 3:6 hisobida imkoniyatni boy bergan edi.