Boboqulov, Vahobov, Umurzoqov "Qizilqum" ko'rigida

Navoiyliklar poytaxtimizdagi “Obod” va “Yoshlik” stadionlarida kuniga ikki mahaldan mashg'ulotlar olib boryapti.

Klub rahbariyati va murabbiylar shtabi yangi futbolchilarni sinovdan o'tkazishmoqda. Dastlab Feruz Boboqulov, Bahriddin Vahobov (“Buxoro”), Xurshid Yo'ldoshev (“Oqtepa”), Bobir Mamirov (Rossiya)larning “Qizilqum” mashg'ulotlariga qo'shilganligini bildirgandik.

Kuni kecha esa yarim himoyachi Muzaffar Umrzoqov navoiyliklar bilan mashg'ulotlarni boshladi. SHuningdek, o'tgan mavsumda “Bunyodkor” yoshlari tarkibida o'ynagan himoyachi Nodir Otajonov ham murabbiylar sinovidan o'tmoqda.

 9 yanvar kuni navoiyliklar “Obod” stadionida nazorat uchrashuvida maydonga tushdilar. Ushbu bahsda birinchi liga vakili “Obod” futbolchilari “Qizilqum” raqibi bo'ldi.

Mezbonlarga qarshi konchilar quyidagi tarkibda maydonga chiqishdi: Erkin Jabborov, Fayzulla Qambarov, Asqarjon Muhiddinov, Azizbek Usmonov, Mirjalol Qurbonov, Farruh Haydarov, SHerali Jo'raev, Alisher Sanoev, G'ayrat Jumaev, Jamshid SHohnazarov, Alisher Xoliqov.

Zaxiradan maydonga tushganlar:  Ruslan Sanaev, Bahriddin Vahobov, Nodir Otajonov, Sarvarjon Xolmatov, Bobir Mamirov, Nodirjon SHaxobiddinov, Feruz Boboqulov.

 Uchrashuv deyarli to'liq navoiyliklar tashabbusi ostida o'tgan bo'lsa-da, yaratilgan vaziyatlarni golga aylantirishda aksariyat vaziyatlarda ularga aniqlik etishmadi. O'yin taqdirini yagona gol hal qildi.  Tinimsiz yoqqan yomg'ir ostida kechgan uchrashuvning 43-daqiqasida  mezbonlar himoyachisi o'z jarima maydonchasi ichida hujumchi Alisher Xoliqovni qo'pollik bilan to'xtatib qoldi. Bosh hakam bu vaziyatda ikkilanmasdan 11-metrlik nuqtani ko'rsatdi. Bu imkoniyatdan jabrlanuvchining o'zi unumli foydalanib, hisobni ochdi. Bahs yakuniga qadar maydonda shiddatli va keskin kurash borgan bo'lsa-da, o'yin oxirigacha hisob boshqa o'zgarmadi.

Rejaga ko'ra, navoiyliklar navbatdagi o'rtoqlik uchrashuvini 12 yanvar kuni o'tkazadi. Unda Samarqand dinamochilari “Qizilqum” jamoasi raqibi bo'ladi. O'yin soat 13.00 da “Obod” stadionida boshlanadi.