Bizga Jahongir Usmonov davridagi futzal kerak!

AGMK qayd etgan natijalarni qarang. Tojikiston klubini mag'lub eta olmadik-a. Yaqin-yaqingacha bizda futzalning o'z "egasi" bor edi. Futzalga o'z farzandidek qarardi. Bir qator o'zgarishlar tufayli futzal associaciyasi yopildi. Balki eski rahbariyatning ishidan yangilar qoniqish hosil qilmagandir. Lekin bugunga kelib, hech kim futzaldan qoniqmayapti.

Futzal xuddi somonga tushgan igna kabi yo'qoldi. Osiyo chempionlar ligasida alamli tovushini eshitdik va o'ngrab yig'layotganini ko'rdik. Eng yomoni, O'FAning (O'zbekiston futzal Associaciyasi) bironta xodimi hozirgi O'FAda futzal bilan band emas. Hozirgi futzalda bilishimizcha faqat Jahongir Rahmatullaev qolgan, lekin uning bugungi kundagi vazifasi PFLda komissarlik qilishdan iborat bo'lib qolgandek. Futzalni rivojlantirish bo'yicha dasturga javobgar masul yo'q. Aslida dastur bormi o'zi degan savol ham yuzaga keladi. Terma jamoa bizda bormi-yo'qmi, buni ham bilmaymiz. 

CHempionatni uy-safar tizimi yo'lga qo'yilgani yaxshi bo'ldi, ammo futzalning "F" harfini tushunmaydigan klublarni zo'rlash oqibatida sifat yo'qoldi. "Ardus", "Do'stlik-A", "Kogon" kabi futzalni ushlab turgan klublar yo'q bo'ldi. Menimcha, "Ardus" nomining o'chgan sanasi futzal binosi darz ketishiga sabab kun bo'ldi. 

O'zbekiston futzalda nimaga erishgan bo'lsa, "Ardus" va uning do'stlari tufayli bo'ldi. Bu xuddi Ispaniya chempionatidan "Real" va "Barselona" olib tashlangandek gap. Aynan "Ardus" yoshlarni saralash va boshqa klublarga uchirma qilish bilan shug'ullanardi. AGMKni ham shu kungacha erishgan yutuqlari "Ardus" bilan chambarchas bog'liq aslida.

Ayni paytda O'FA va PFLda bo'layotgan o'zgarishlardan kelib chiqsak, O'FAning o'zida mutaxassislar tanqisligini ko'ramiz. Bu narsa ayniqsa futzalda yaqqol ko'zga tashlanyapti. Kechagi mag'lubiyat faqat AGMKNing mag'lubiyati emas, bu butun O'zbekiston futzalining bugungi ahvolini ko'rsatib berdi. SHunday ekan, O'FA rahbariyatidan futzalga ham jiddiy etibor qaratishlarini kutib qolamiz. Zero kattalar o'rtasidagi yagona quvonchni JCHga chiqib aynan shular bizga tuhfa etgandi.

X.Xoliqov.