Birinchi liga, "G'arb". May oyining eng yaxshi futbolchisi Viktor Klishin!

Unga ko'ra "G'arb" mintaqasida oyning eng yaxshi futbolchisi Viktor Klishin bo'ldi. "SHo'rtan" hujumchisining ishtaxasi may oyida ochilib ketdi. Buni mazkur oy davomida bo'lib o'tgan 5ta o'yinda jami 10ta gol urgani ko'rsatib turibdi. G'uzorliklarning sermahsul o'yin namoyish etishida aynan Klishinning tutgan o'rni katta bo'lmoqda. Qolaversa chempionatda ham Klishin to'purarlik qilmoqda.  

Keyingi o'ringa Solijon Xayrullaev munosib deb ko'rildi. "G'allakor-Avtomobilchi" azosi ham may oyida bir qator gollar urib, jamoasi muvaffaqiyatlariga hissa qo'shdi. 23 yoshli futbolchi may oyda o'tkazilgan oltita o'yinda oltita gol urishga erishdi. Jamoasi esa 4 ochko ishladi.

Oyning eng yaxshi futbolchisi uchligini Navro'z Haipov yakunlab berdi. Nukuslik futbolchi yodingizda bo'lsa, aprel oyida ham eng yaxshi futbolchilar qatoridan joy olgandi. Haipovni may oyi eng yaxshilari qatoriga kiritganimiz ham bejiz emas albatta. Boisi futbolchi "Orol"da to'purarlik salohiyatini namoyish etmoqda. Mazkur oyda o'tkazilgan 6ta o'yinda Navro'z 4ta gol urishga erishdi.

May oyining eng yaxshi futbolchisi
1. Viktor Klishin - "SHo'rtan"
2. Solijon Xayrullaev - "G'allakor-Avtomobilchi"
3. Navro'z Haipov - "Orol"