"Barselona" va "Liverpul" sobiq yulduzi Toshkentga etib keldi FOTO

Mazkur tadbirda La liga elchisi - yaqin o'tmishning mohir futbolchilaridan biri Luis Garsiya ham ishtirok etadi.  Bugun erta tongda jahon futbolida o'z izini qoldira olgan futbolchilardan biri Garsiya Toshkentga etib keldi.  Uni bir qator ispan futboli shinavandalari,  futbolimiz jamoatchiligi vakillari tantanali tarzda kutib olishdi.  
 
Luis Garsiya "Ommaviy El Klasiko" tadbirida qatnashadi va yosh futbolchilarga mahorat darsi o'tib beradi.  Qolaversa,  "Barselona" - "Real M" uchrashuvi oldidan Temur Kapadze boshchiligidagi "Real Madrid" vakillariga qarshi "Barselona" safida ko'rgazmali o'yinda maydonga ham tushadi.

- Toshkentda bo'lib turganimdan juda ham mamnunman.  Bugungi kun doirasidan o'rin olgan barcha tadbirlarni yuqori saviyada o'tkazishimizga ishonaman.  "El klasiko"dek juda muhim uchrashuvni o'zbekistonlik futbol ishqibozlari bilan tomosha qilish imkoniyatiga egaligimdan xursandman.  Futbol targ'ibotini kuchaytirishga xissa qo'shayotganimdan va bu orqali O'zbekistonda ham do'stlar orttirayotganimdan baxtiyorman,  - deya fikr bildirdi Garsiya.  
 
Takidlab o'tamiz,  bugun soat 12:15 da Luis Garsiya ishtirokida matbuot anjumani ham tashkil etiladi.

Yurtimizdagi "Barselona" fan klubi vakillari Luis Garsiyaga maxsus o'zbekcha naqshlar tushirilgan futbolka sovg'a qilishdi.

Foto: Abdullo Fayzullaev