Bahodir Ahmedov: "Musobaqaga jarohatlarsiz yo'l oldik. Futzalchilar o'yinlarga tayyor"

Ketish chog'ida saytimiz muxbirlari bosh murabbiy Bahodir Ahmedovning fikrlari bilan qiziqdi. 

"Tayyorgarlik juda yaxshi o'tdi. Mashg'ulotlardan ko'nglimiz to'ldi. Ispaniyalik murabbiy bilan ishladik. Yigitlardan ko'nglim to'q. Katta jarohatlar yo'q. Futzalchilar bo'lajak bahslarga tayyor. 

Ruhiyat doimgidek jangovar. Bu borada ham munosib tayyorlandik. Musobaqaning ilk o'yini doim qiyin o'tadi. G'alaba uchun o'ynaymiz. Muxlislarga bizni doim qo'llab-quvvatlashayotgani uchun minnatdorchilik bildiraman. Ularni xursand qilishga harakat qilamiz",- deydi Bahodir Ahmedov. 

SHuningdek, iqtidorli futzalchi Husniddin Nishonov ham fikrlari bilan o'rtoqlashdi. 

"Ichki muhit juda zo'r. Tayyorgarlik yaxshi kechdi. Ispaniyalik mutaxassis bilan ishlab jismoniy holatimizni yanada optimallashtirdik. Bu yilgi Osiyo chempionatida Erondan oladigan revanshimiz bor. Vatanimizga yorug' yuz bilan qaytishni maqsad qilganmiz. Ketishdan oldin biroz hayajon borligini hisobga olmasa, hammasi joyida. Nasib qilsa, yurtimizga medal bilan qaytish uchun bor kuchimizni ishga solamiz",- deydi Husniddin Nishonov.