Azamat Abduraimov: "Aleksandr Lupashko bilan Temur Hakimov endi “Andijon”da o'ynashmaydi"

Futbolchilar kuniga ikki mahaldan shug'ullanishmoqda va mashg'ulotlar “Sog'lom avlod” stadionida olib borilyapti. Yig'in qanday o'tayotganiligi borasida “Andijon” bosh murabbiyi Azamat Abduraimov quyidagi fikrlarni bildirdi.

- 9 iyul kuni birinchi bosqichning oxirgi uchrashuvini o'tkazganimizdan so'ng futbolchilarga 12 kunlik tatil berdik. Ikkinchi bosqich o'yinlari 12 avgustdan boshlanishi bois 22 iyuldan tayyorgarlikni boshladik. CHunki mana shu 20 kun ikkinchi bosqichga tayyorgarlik ko'rishimiz uchun etarli bo'ladi. Qolaversa, tatil chog'ida o'z ustida ishlashi uchun futbolchiga alohida dastur ham tuzib bergandik. 22 iyul kuni bazaga yig'ilgan bo'lsak, ertasi kuni futbolchilar test-sinovlarini topshirishdi. Test natijalari esa ayni paytda futbolchilar yomon formada emasliklarini ko'rsatdi. Yig'inning dastlabki haftasida etiborni o'yinchilarning jismoniy holatini oshirishga qaratdik. SHu bilan birga taktikaga ham alohida urg'u berdik. Qolaversa, nazorat o'yinlarida ham futbolchilarning imkoniyatlarini tekshirib boryapmiz. 28 iyul kuni “Neftchi” o'rinbosarlari bilan kuch sinashdik. Ertaga esa oliy liga vakili “Navbahor” jamoasi bilan bellashamiz. Bu biz uchun o'ziga xos sinov uchrashuvi bo'ladi. Oldimizga oliy ligaga qaytish vazifasini qo'yganimiz bois elita jamoasi bilan bo'ladigan o'yinda bunga qay darajada qodir ekanligimizni tekshirib olamiz. “Sog'lom avlod” stadionida bo'ladigan “Navbahor”ga qarshi kechadigan o'rtoqlik uchrashuviga muxlislarni taklif etamiz. O'yin o'rtoqlik maqomini olgan bo'lib natija unchalik ahamiyat kasb etmasada, g'alaba qozonishga harakat qilamiz.

Tarkibdagi o'zgarishlarga to'xtaladigan bo'lsak, ayni paytda bir qator o'yinchilarni ko'rikdan o'tkazyapmiz. “Surxon” jamoasidan ikki nafar futbolchi kelgan. “Paxtakor-2” jamoasidan Asilbek Mansurovni taklif etganmiz. Mansurov bundan ikki yil oldin Meksikada o'tgan o'smirlar o'rtasidagi jahon chempionatida qatnashgan. SHuningdek, andijonlik ishqibozlarga yaxshi tanish bo'lgan futbolchi Anvar Abduqodirov ham mashg'ulotlarimizda ishtirok etmoqda. Bundan tashqari yig'inda asosiy etiborni mahalliy yoshlarni sinab ko'rishga qaratganmiz. Hozirda bir nechta mahalliy yosh o'yinchilar ham safimizda shug'ullanishmoqda. SHu bilan birga bugunda “Paxtakor” yoshlar jamoasi azosi va aslida andijonlik bo'lgan Ilhom Abdug'anievni ham jamoaga jalb etishni rejalashtirganmiz. U Dilshod Nuraliev boshchiligidagi o'smirlar terma jamoasi o'yinchisi sanaladi. Agar hammasi yaxshi kechsa Abdug'aniev ikkinchi bosqichni “Andijon”da o'tkazadi. Jamoadan ketganlar haqida gapiradigan bo'lsam, Asker Najafaliev birinchi bosqichda o'zini ko'rsata olmagani uchun u bilan xayrlashdik. Qolaversa, yil boshida “Olmaliq” va “Paxtakor”dan ijaraga olingan Aleksandr Lupashko bilan Temur Hakimov endi “Andijon”da o'ynashmaydi. Ular oliy liga klublarida to'p surishni maqul topishdi. Ikkala futbolchi ham birinchi bosqichda yomon o'yin ko'rsatishmadi. Tartib-intizomni buzgani uchun SHahboz Jumaboevni transferga qo'ydik. U safardagi uchrashuvimizga negadir bormadi. SHu bois Jumaboevni jazolab uni transferga qo'ydik. O'z navbatida “Andijon” klubi uchun begona bo'lmagan mutaxassis Orif Mamatkazinni murabbiylar shtabiga taklif etganimizni ham aytib o'tishim kerak. U jamoada katta murabbiy bo'lib ishlaydi. Birinchi bosqichdagi ishtirokimizni tahlil qiladigan bo'lsak, himoya chizig'ida xatolar ko'zga tashlandi va ko'plab gollar o'tkazib yubordik. SHu bois Mamatkazin mashg'ulotlarda himoyachilar bilan ham alohida ish olib boradi.

Umuman olganda oldimizdagi asosiy vazifa “Andijon”ni oliy ligaga qaytarish va ayni damda shu maqsad yo'lida astoydil mehnat qilyapmiz. Bundan tashqari mahalliy o'yinchilarni to'g'ri yo'lda tarbiyalash va jamoa negizini shakllantirish ham maqsadimizdan biri.