"Ayol makri – qirq tuyaga yuk"

Aleshandro Pato

«Milan» klubi 2007 yilda Braziliya diyoridan 18 yoshli hujumchini olib keladi. Patoga bo'lajak jahon yulduzi sifatida qaralardi. Istedodli hujumchi A ceriyadagi dastlabki mavsumidayoq o'zini 9 marta ko'rsatishga ulgurdi. SHundan so'ng, u Italiyada ajoyib 3 mavsum o'tkazdi. Kutilmaganda orttirib olingan jarohat uning o'yinida pasayish keltirib chiqardi va asosiy tarkibdagi o'rnini yo'qotdi. Bu paytda Pato klub xo'jayini Silvio Berluskonining arzanda qizi Barbara Berluskoni bilan uchrasha boshlagandi. Bu muhabbat tarixi jamoa bosh murabbiyiga yoqmas, u Pato futbolchi sifatida tanazzulga uchraganini anglayotgandi. Braziliyalik futbolchi dastlab, murabbiy bilan, keyin butun jamoa bilan ziddiyatlarga bora boshladi. Keyinchalik, Pato Braziliyaga qaytishni mantiqan to'g'ri deb bildi. Juftlik ajrashishga qaror qilishgandi. Futbolchi o'sha kundan boshlab bir necha bor avvalgi mavqeyini tiklashga harakat qilib ko'rdi. Ammo, barchasi besamar ketdi. Pato Xitoy chempionatidagi faoliyatini yakunlagach, bugungi kunda Braziliyaning «San-Paulu» klubi sharafini himoya qilmoqda.

Tomas Myuller

O'tgan yili «Bavariya» klubi futbolchisining turmush o'rtog'i jamoa bosh murabbiyi Niko Kovachni tanqid qilgandi. O'sha paytda Myunxen klubi yaxshi natijalar qayd etolmayotgandi. Navbatdagi ochko yo'qotilishidan keyin Kovach Myullerni zaxiraga oladi. SHundan keyin, Tomasning rafiqasi Liza Myuller Instagram’dagi sahifasida «Murabbiy nima bo'layotganini tushunishi uchun 70 daqiqa kerak bo'ladi», deb post qoldirgandi. Klub qizni murabbiydan uzr so'rashga majbur qildi. Biroq, Tomas o'sha paytdan boshlab Kovach jamoasi tizimidagi asosiy o'yinchi maqomini yo'qotdi.

Mauro Ikardi

Futbolchining rafiqasi va agenti Vanda Nara reining karerasini buzishni 20 yoshidayoq boshlagandi. Vanda oldingi eri Maksi Lopesni (futbolchi, Argentina MTJning sobiq azosi) 3 farzandi bilan qoldirib, Mauro bilan yangi sevgi tarixini yozishga kirishgandi. Natijada, Mauro Argentinada ko'pchilik, jumladan, Messining ham nafratiga duchor bo'lib o'zi uchun terma jamoa eshiklarini berkitib qo'ydi. Argentinalik futbolchi 25 yoshiga qadar ikki marta Italiya chempionati to'purari va yil futbolchisi, deb topildi. SHundan keyin, uning faoliyati oldinga siljimadi. U Evropa grandlari etiborini qozongan pallada asosiy sahnaga Vanda Nara chiqib keldi. U «Inter»ning yaxshilangan yangi shartnomasini bekor qilishga urindi. Doimiy ravishda matbuotda qo'pol chiqishlar qildi va klubni aybladi. Natijada, klub futbolchidan ham, uning rafiqasidan ham bezidi va yangi klub qidiraverishlari kerakligini takidladi. Eslatib o'tamiz, Ikardi hozir ijara asosida PSJ klubi sharafini himoya qilmoqda.

Fahriddin Ro'ziev