Asror Aliqulov: "Biz Superligada eng kam smetaga ega bo'lgan klubmiz, biroq..."

O'yin haqida

- Birinchi bo'limda Superliga starti bilan bog'liq futbolchilarda hayajon kuzatildi. Kirishib ketishda qiyinchiliklarga duch keldik. "Dinamo"ning kuchli tomoni qanotlar. Biz ko'proq qarshi hujum maqsadi bilan reja tuzgandik. Bo'lim oxirida o'tkazib yuborilgan gol boshqacharoq uslubga olib keldi. Vaziyatlar yarata oldik, biroq gol urish nasib etmadi. Birinchi o'yin uchun yomon o'yin ko'rsatmadik. 

- "Mashal"ning joriy mavsumdagi rejalari qanday?

- Sharoit borasida muammo yo'q. Biz Superligada eng kam smetaga ega bo'lgan klubmiz, biroq bu amalda hech narsani anglatmaydi. Klub uchun qo'yilgan talab Superligaga chiqdikmi, munosib o'ynash. "Mashal" baribir o'zining avvalgi mavqeiga qaytadi.

- Jamoa o'zbek futboliga juda ko'p nomlarni etkazib bergan. Bu amaliyot hozir ham davom etayaptimi?

- Qisqa vaqtda biz Superligaga chiqdik. Yoshlarga tajriba kerak, bu katta o'yinlarda sezilib qolayapti. Biz jamoa yoshlarini katta futbolga tayyorlash uchun mashg'ulotlarda astoydil ishlayapmiz. U-21 va U-19 jamoamizda yosh iqtidorli futbolchilar bor, biz "Mashal"ni avvalgi davrlardagi kabi yangi nomlarni etkazib berishi ustida ishlayapmiz.

- Jamoa akademiyasi yopilayotgani haqida xabarlar rostmi?

- Qiyinchiliklar bo'lgani rost. Lekin hozir akademiya to'liq hajmda ishlamoqda.