“Andijon” yangi futbolchilarni tibbiy ko'rikdan o'tkazdi

Mashg'ulotlar Viktor Jalilov boshchiligida o'tkazilmoqda. Rejaga ko'ra, bugun futbolchilar tibbiy ko'rikdan o'tdi. Etiborlisi ularning orasida yangilar ham bor. Xususan, so'nggi ikki yilni Malayziya chempionatida o'tkazib qaytgan Bobur Akbarov yana jamoaga taklif etildi. Tajribali himoyachi klub rahbariyati bilan o'tkazgan muzokaradan so'ng joriy mavsumni “Andijon”da boshlashi  aniq bo'ldi.

SHuningdek so'nggi yillarni “Neftchi”da o'tkazib kelgan qanot yarim himoyachisi Abdurahmon Abdulhaqov hamda “Mashal” bilan xayrlashishga qaror qilgan yarim himoyachi Abdulloh Olimov “Andijon” jamoasi bilan kelishuvga erishdi. Ushbu futbolchilar PFL talabiga binoan bugun tibbiy ko'rikdan o'tkazildi.

Tarkibni kuchaytirish maqsadida hozirda yana bir qator futbolchilar bilan muzokara o'tkazilmoqda. Yangi futbolchilar katta extimol bilan jamoaning Toshkentda boshlanadigan yig'iniga kelib qo'shiladi. Malumot uchun “burgutlar”ning o'quv-yig'ini  8 yanvardan poytaxtga ko'chadi.

Turkiya yig'iniga qadar murabbiylar shtabi selekciya ishlarini yakunlab, tarkibni shakllantirib olishga xarakat qilmoqda.