"Andijon": Muhamedov va Karimov keldi

Tarkibga kuni-kecha ikki nafar yangi o'yinchi kelib qo'shildi. Ularning biri darvozabon Abdukarim Muhamedovdir. Xuquqiy jihatdan Bunyodkor azosi bo'lgan iqtidorli posbon kecha jamoa qarorgohiga etib keldi va mashg'ulotlarga qo'shildi. Muhamedov 1994 yilda tavallud topgan. Bungacha asosan yoshlar va birinchi liga musobaqasida xarakat qilgan. Bo'ydor bo'lgan Abdukarim endilikda Andijon murabbiylarida iliq taassurot qoldirish uchun mashg'ulotlarda astoydil ishlamoqda.

Undan tashqari kuni-kecha jamoamiz safiga hujumkor yarim himoyachi SHahzodbek Karimov ham kelib qo'shildi. 1992 yilda tug'ilgan ushbu futbolchi mavsum-2016ni Jizzaxning So'g'diyona jamoasida o'tkazgan.

Ayni damda har ikki futbolchi ham ko'rikda ekanligini aytib o'tish lozim. Agarda ularning xatti-xarakatlari murabbiylarga maqul kelsa, shartnoma imzolanadi.
Darvoqe, bugun burgutlar navbatdagi sinov-nazorat bahsida maydonga chiqadi. Bu safargi raqib ham yana Yozyovon-Lochinlaridir. Faqat bu galgi o'yin Yozyovonda o'tadi.

"Andijon" matbuot xizmati