Aleksandr Xomyakov: “Negadir o'z o'yinimizni ko'rsata olmayapmiz”

Bahs yakuniga etgach, “gazchilar” ustozi Aleksandr Xomyakovning fikrlari bilan qiziqdik.

- Aleksandr Andreevich, avvalo o'yin haqida nima deya olasiz?
- O'yin biz uchun og'ir kechdi. Negadir mashg'ulotlarda ishlab chiqilgan usullarni o'yin paytida qo'llay olmayapmiz. Garchi yirik hisobda g'alaba qozongan bo'lsak-da, ko'rsatgan o'yinimiz chiroyli chiqdi deya olmayman.

- 3:0 hisobidagi g'alaba jamoalar orasidagi farqni ko'rsatib turibdimi?
- Bunday demagan bo'lardim. Sababi hozir barcha jamoalar futbol o'ynashni bilishadi. Yirik hisobdagi g'alaba esa asosan vaziyatlardan unumli foydalanganimiz uchun yuzaga keldi. Lekin o'yin tomonlama katta ustunlikka erishdik deb aytolmayman. Biz negadir o'z o'yinimizni ko'rsatishni to'xtatib qo'ydik. Qolaversa, uchta gol urishdan tashqari to'rtta yaqqol imkoniyatni ko'kka sovurdik.

- Raqib sizda qanday taassurot qoldirdi?
- Raqib jamoaning harakat qilayotgani ko'rinib turibdi. Ular o'yindan zavq olish uchun, biz esa ochkolarni qo'lga kiritish uchun to'p surdik.

- Ikkinchi bosqich o'yinlari qiyin kechyapti deb o'ylaysizmi?
- Bu erda 16ta eng kuchli jamoa yig'ilgan desa bo'ladi. Lekin shunga qaramay, unchalik qiynalayotganimiz yo'q. “Oqtepa”ga o'z aybimiz bilan yutqazdik. Lekin raqibni bizdan kuchli edi deya olmayman.

- Jamoaga yangi qo'shilgan Oybek Polvonov haqida fikringiz?
- U bizning tarkibga ikkinchi bosqich oldidan kelib qo'shildi. Harakatlari chakki emas. Jamoadoshlari bilan qancha tez chiqishib ketsa, o'yini shuncha yaxshilanadi deb o'ylayman.